काठमाडौं, भदौ २८ । बालअधिकारको संरक्षण तथा सम्बद्र्धनमा उल्लेख्य योगदान पुर्याएका विभिन्न क्षेत्रका व्यक्ति तथा अभियन्ताहरुलाई मंगलबार काठमाडौँ महानगरपालिका–७ मा रहेको बालसंरक्षण तथा सम्बद्र्धन समितिले सम्मान गरेको छ ।
सम्मानित हुनेमा काठमाडौँ महानगरपालिकाद्वारा सञ्चालित मेट्रो एफएममा कार्यरत पत्रकार रुपा शर्मा नेहा, महिला अध्ययन केन्द्रका अध्यक्ष सीता ओझा, बालअधिकारकर्मी मोहन थापा, मनोसामाजिक परामर्शकर्ता सुवासचन्द्र बडाल र ‘कपन बानेश्वर’ प्रथम साहित्यिक साप्ताहिकका प्रधानसम्पादक निबन्ध आचार्य रहेका छन् ।
साहित्यकार रामप्रसाद ज्ञवालीले प्रत्येक वडामा बालबालिकामैत्री समाज निर्माण गरी उनीहरुलाई आफ्नै देशमा काम गर्ने वातावरण सिर्जना गर्नुपर्नेमा जोड दिएका छन् । उनले बालबालिका भोलिको राष्ट्र निर्माणका कर्णधार भएको भन्दै बालमैत्री कार्य सञ्चालन गर्न स्थानीय निकायका प्रतिनिधिलाई अनुरोध गरेका छन् ।
कामपा–७ का वडाध्यक्ष शुद्धकुमार डंगोलले मुलुकमा स्थानीय पूर्वाधार विकास तथा निर्माणका साथै सामाजिक गतिविधिमा आफ्नो संस्था क्रियाशील रहेको जनाएका छन् । उनले अब केन्द्रीकृत शासन प्रणालीबाट मुलुक विकेन्द्रित शासन प्रणालीतिर अगाडि बढिरहेकाले भोलिका दिनमा बालबालिकाको पढ्ने अधिकारलाई सुरक्षित गर्न सामुदायिक विद्यालयसँग सहकार्य गरिने बताए ।
सम्मानित पत्रकार शर्माले बालबालिकामाथि हुने हिंसालाई कम गर्न सबैको सहयोगको खाँचो रहेको औल्याएका छन् ।
