काठमाडौं । नेपाली कांग्रेसका पूर्व सभापति तथा पूर्वप्रधानमन्त्री गिरिजाप्रसाद कोइरालाको स्मृतिमा स्थापना गरिएको जिपी कोइराला फाउण्डेसन विचार तथा अनुसन्धान विभागको पत्रकार जगत नेपाललाई निर्देशकमा नियुक्त गरिएको छ । नेपाललाई उक्त पदमा दुई वर्षका लागि नियुक्त गरिएको जिपी कोइराला फाउण्डेसनले जनाएको हो ।
फाउण्डेशनको अध्यक्ष एवं पूर्व उप–प्रधानमन्त्री सुजाता कोइरालाले नेपाललाई प्रजातान्त्रिक आन्दोलन र गिरिजाबाबुको योगदानका विषयमा अध्ययन अनुसन्धानका लागि पत्रकार नेपाललाई सो विभागको जिम्मेवारी प्रदान गरिएको जानकरी दिएकी हुन् । पत्रकार नेपालले गिरिजाबाबुको नेतृत्वमा भएको जहाज अपहरणलाई समेटेर ‘हाइज्याकिङ फर डेमोक्रेसी’ र ‘राजद्रोही राजनेता’ वृत्तचित्र निर्माण गरिसकेका गरेका छन् ।
यसैगरी नेपालको राजनीतिलाई मिहिन ढंगले समेटिएका उनका चार पुस्तक पनि प्रकाशित भइसकेका छन् । नेपालले स्व. कोइरालाको लाइभ अन्तवार्ता लिनुका साथै उनको जीवनीलाई समेटिएको पुस्तक पनि ‘आफ्नै कुरा’ प्रकाशनमा ल्याइसकेका छन् । वि.सं. २०५४ देखि नेपाली पत्रकारितामा सक्रिय रहेका नेपाल रत्नराज्य लक्ष्मी क्याम्पसका उपप्राध्यापकसमेत छन् ।
जिपी कोइराला फाउण्डेशनले पछिल्लो समय मुलुकको शिक्षा, स्वास्थ्य र पर्यटन क्षेत्रको विकासमा महत्वपूर्ण भूमिका खेल्दैआएको छ । फाउण्डेशनले नेपालबाहेक विभिन्न देशमा आफ्नो शाखा विस्तार गरी सामाजिक काम गर्दै आएको समेत जनाइएको छ । रासस
