कांग्रेस संस्थापन इतर सभापतिका आकांक्षीहरुबीच छलफल हुँदै

काठमाडौं । नेपाली कांग्रेसको १३ औं महाधिवेशन नजिकिँदै गर्दा नेतृत्व आकांक्षीहरुको वार्ता, छलफल र भेटघाटको दौडाहा बढेको छ । त्यसै मेसोमा आज संस्थापन इतर समूहका सभापतिका आकांक्षीबीच सहमतिमा नेतृत्व चयन गर्नेबारे छलफल हुँदैछ । अपरान्ह चार बजे बरिष्ठ नेता रामचन्द्र पौडेल समूहका सभापतिका आकांक्षीहरुबीच छलफल हुन लागेको हो ।

महाधिवेशनमा आफ्नो समूहबाट सभापतिमा एउटा मात्रै उम्मेदवार तय गर्ने प्रयासस्वरुप उक्त छलफल बोलाइएको पौडेल समूह निकट नेताले बताए । पौडेल समूहका नेता अर्जुननरसिंह केसीको पहलमा सभापतिका सबै आकांक्षीलाई एकै ठाउँमा राखेर छलफल गर्न लागिएको हो । पौडेल समूहबाट आधा दर्जन नेतृत्वका आकांक्षी छन् ।

बरिष्ठ नेता पौडेल, महामन्त्री डा. शशांक कोइराला, पूर्वमहामन्त्री प्रकाशमान सिंह, केन्द्रीय सदस्य डा. शेखर कोइराला र कल्याण गुरुङले सभापतिमा उम्मेदवारी दिने आकांक्षा राखेका छन् । त्यस्तै पूर्व सहमहामन्त्री केसी र नेता डा. रामशरण महतले पनि सभापतिको दावी गरेका छन् ।

कांग्रेस महाधिवेशन भदौ १६ देखि १९ गतेसम्म काठमाडौंमा हुँदैछ । संस्थापन समूहबाट सभापति शेरबहादुर देउवाले नेतृत्वमा दोहोरिने तयारी गरिरहेका छन् भने उपसभापति विमलेन्द्र निधिले पनि सभापतिमा दावी गरेका छन् । तेस्रो समूहका नेता पूर्वमहामन्त्री कृष्णप्रसाद सिटौलाले सभापतिमा उठ्ने बताइरहेका छन् ।