काठमाडौं । नेपाली कांग्रेसका वरिष्ठ नेता रामचन्द्र पौडेलले काँग्रेस क्रियाशील सदस्यता छानविन समितिको कार्यालयमा पुगेर समितिले गरिरहेको कामका बारेमा जानकारी लिएका छन् । क्रियाशिल सदस्यता छानविन समितिले काम गरिरहेको तिलगंगा स्थित नेपाल भारत मैत्री धर्मशाला पुगेर नेता पौडेलले क्रियाशील छानविन समितिले गरिरहेको कामका बारेमा जानकारी लिएका हुन् ।
छानबिन समितिका संयोजक रमेश लेखकले क्रियाशील छानबिनका क्रममा अहिलेसम्म ६४ जिल्लाको क्रियाशील सदस्यताको टुंगो लागेको र ५७ जिल्लाको नामावली छाप्ने कामसमेत सकिएको जानकारी दिए । १४औँ महाधिवेशनका लागि ७७ वटै जिल्लाबाट पुराना सदस्यको नवीकरण र नयाँ सदस्यता वितरण गरी साढे आठ लाखभन्दा बढी सदस्यको नामावली केन्द्रीय कार्यालयमा सूचीकरण भएको छ ।
तीमध्ये करिब तीन सय वडामा अझै पनि विवाद छन् । ती विवादको समाधान गरी छानबिन समितिले असार ३० भित्र क्रियाशील सदस्यको नामावली टुंगो लगाई सभापति शेरबहादुर देउवासमक्ष बुझाइसक्नुपर्ने कार्यतालिका छ । वरिष्ठ नेता रामचन्द्र पौडेलले क्रियाशील सदस्यता छानविन समितिले गरेको काम प्रशंसनीय भएको भन्दै निर्धारित समयमै टुंग्याउन निर्देशन दिएका थिए ।
क्रियाशील छानविन समितिका प्रवक्ता प्रदीप पौडेलका अनुसार वरिष्ठ नेता पौडेलले तोकिएको समयमा पार्टीको १४औं महाधिवेशन गराउने जिम्मा क्रियाशील सदस्यता छानविन समितिको काँधमा रहेको समेत बताएका थिए । पौडेलका अनुसार छानबिन समिति समक्ष विदेशबाट बाहेक नौ लाख २५ हजार जनाले क्रियाशील सदस्यका लागि आवेदन दिएका छन् ।
६ हजार सात सय ४३ वटा मध्ये करिब दुई सय वटामा नयाँ क्रियाशील वितरण सच्याउन माग गर्दै उजुरी परेको बताइएको छ । समितिलाई असार २० गतेभित्र छानबिन सक्न भनिए पनि मसान्तसम्म लाग्ने प्रवक्ता पौडेलले जनाएका छन् । त्यस्तै महामन्त्री डा. शशांक कोइरालाले म, विमलेन्द्र निधि र प्रकाशमान सिंह हामी तीन जनामध्ये एक जना मात्र सभापतिमा उठ्छौं भनेको कुराले काँग्रेसभित्रको राजनीतिमा तरंग पैदा भएको छ ।
