सिमकोट । दुर्गम हिमाली जिल्ला हुम्लामा युवाहरुले पूर्खालाई सम्झिँदै गोठालाको कथामा आधारित म्युजिक भिडियो निर्माण गरेका छन् । पछिल्लो समय मध्यपश्चिम तथा सुदूरपश्चिमको देउडा ठाडी भाका गीत लोप हुँदै गएको छ । त्यसलाई बँचाइराख्न हुम्लाका युवाहरुले हुम्लामै देउडा गीतको म्युजिक भिडियो छायाङ्कन गरेका छन् ।
देउडा संस्कृतिलाई जगेर्ना गर्ने स्रष्टाहरूलाई बजारीकरणमा टिक्न र बिक्न समस्या भएपछि लोप हुन थालेको देउडा ठाडी भाका गीतमा स्थानीयस्तरमै युवाहरू म्युजिक भिडियो उत्पादनमा लागेका हुन् । समयको परिवर्तनसँगै बजारमा रिमिक्स, आधुनिक, लोकगीत–संगीतल बजार ढाकिरहेकाले छुट्टै पहिचान बोकेको देउडा ठाडी भाका लोप हुँदै गएको हो ।
त्यसकारण स्थानीयस्तरमै देउडा ठाडी भाका गीतको छायांकन गरिएको निर्देशक तथ पत्रकार पदमराज हमालले जनाएका छन् । ‘जिन्दगी अधुरो बनाई छोडी बाईगई माया’ बोलको देउडा ठाडी भाका गीत हुम्लामै पहिलोपटक निर्माण गरिएको निर्देशक हमालले बताएका हुन् । गोठालाहरूको दुःखपीडालाई आधार बनाई माया प्रेम झल्काउने गीतको भाव रहेको निर्देशक हमालको भनाइ छ ।
गीत स्थानीय गायक मनबहादुर थापाको स्वर र शब्दमा सिंगारिएको छ । म्युजिक भिडियोमा पनि हुम्लाकै स्थानीय कलाकारहरुको अभिनय रहेको बताइएको छ । गीतमा हुम्लाका सञ्चारकर्मी नरजन तामाङ, उर्मिला शाही र विष्णु बुमीको अभिनय रहेको छ । यस गीतको छायांकन जिल्लाकै पत्रकार हमाल, अविनाश लामा र अर्जुन बोहराले गरेका छन् ।
