बागलुङ । बागलुङको गलकोटमा चारजना मजदुरको सुतेकै ठाउँमा मृत्यु भएको छ । गलकोट नगरपालिका–७ गैराखर्कमा चार मजदुरको सोमबार राति सुतेकै ठाउँमा मृत्यु भएको प्रहरीले जनाएको छ । प्रहरीले ती मजदुरको मृत्यु घरेलु मदिराको कारण भएको आशंका गरेको छ ।
त्यसरी मृत्यु हुनेमा रोल्पाको सुनिल स्मृति गाउँपालिका वडा नम्बर ५ का २१ वर्षीय दीपेन्द्र पुन, सोही ठाउँका ३९ वर्षीय दुधबहादुर राना, ५१ वर्षीय रेखबहादुर राना र ३० वर्षीय प्रबिन घर्ती रहेको जिल्ला प्रहरी कार्यालय बागलुङले जनाएको छ । त्यसैगरी रोल्पाकै सुनिल स्मृति गाउँपालिका– ५ गजुलका ३८ वर्षीय खेमराज घर्ती र सोही ठाउँका २६ वर्षीय रवीन्द्र पुनको अवस्था गम्भीर रहेको जनाइएको छ ।
उनीहरु गलकोट बृहत् खानेपानी आयोजनामा काम गर्दै आएका थिए । गैराखर्कमा मजदुरी गर्दै आएका ती ६ जना मजदुरको स्वास्थ्यमा समस्या आउपछि उपचारका लागि धौलागिरी अस्पताल ल्याउँदै गर्दा चार जनाको बाटोमै ज्यान गएको र दुईजनाको उपचार भइरहेको बताइएको छ । घरेलु मदिरा सेवनका कारण उनीहरुको मृत्यु भएको प्रहरीले दाबी गरेको छ ।
