काठमाडौं । अपि पावर लिमिटेडले बिक्री नभएको हकप्रद शेयर लिलाममा बिक्री गर्ने भएको छ । कम्पनीले गत जेठ २० गतेदेखि असार १३ गतेसम्म बिक्री गरेको हकप्रद शेयरमा भनेजति आवेदन नपरेपछि २ लाख १५ हजार ५९९ कित्ता हकप्रद शेयर लिलाममा बिक्री गर्न लागेको हो ।
सो शेयर खरिदका लागि साउन १३ गतेदेखि २० गतेसम्म शिलबन्दी बोलपत्र पेश गर्न सकिनेछ । सो शेयरको न्यूनतम मूल्य १०० रुपैयाँ तोकिएको छ । लगानीकर्ताले सो वा सोभन्दा बढी मूल्य अंकित गरी बोलपत्र पेश गर्नुपर्नेछ ।
लगानीकर्ताले न्यूनतम १०० कित्ताका लागि आवेदन दिनुपर्ने हुन्छ भने अधिकतम शेयर संख्याका लागि कुनै हद तोकिएको छैन । कम्पनीको शेयर बिक्री प्रबन्धक मुक्तिनाथ क्यापिटल लिमिटेड रहेको छ ।
लगानीकर्ताले बिक्री प्रबन्धकका साथै मुक्तिनाथ विकास बैंकका भक्तपुर, ललितपुर, इटहरी, इलाम, पोखरा, बुटवल, विराटनगर, वीरगंज, नारायणगढ, सुर्खेत, नेपालगंज, धनगढी र जनकपुर शाखा कार्यालयबाट सेयरका लागि आवेदन दिन सक्ने छन् ।
