काठमाडौं । नेपाली कांग्रेसको क्रियाशील सदस्यता छानबिन समितिले तयार पारेको प्रतिवेदन आगामी मंगलबार पार्टी सभापति तथा प्रधानमन्त्री शेरबहादुर देउवालाई बुझाउने भएको छ । सभापति देउवालाई मंगलबार बिहान ९ बजे बुझाउने समय तालिका तय भएको हो ।
क्रियाशील सदस्यता छानबिन समितिले आफ्नो काम पूर्ण रुपमा सकिएपछि मात्रै तल्लो तहको अधिवेशनको मितिबारे छलफल हुने बताएको छ । आज बसेको पदाधिकारी बैठकले साउन १२ गते तय भएको वडा अधिवेशन स्थगित गरिसकेको छ ।
उसोत नेपाली कांग्रेसको निर्वाचन समितिले भदौ १६ देखि १९ गतेसम्म सम्पन्न गर्ने भनिएको १४औँ महाधिवेशन अहिले गर्न नसकिने पनि स्पष्ट पारिएको छ । कांग्रेस शीर्ष नेताहरुको बैठकमा समिति संयोजक महादेव यादवले समय नपुग्ने कारण फेरि दोहो¥याएका छन् । यादवले पार्टीका सबै संरचनाको अधिवेशन सम्पन्न गर्न निर्वाचन समितिलाई घटीमा ५२ दिन लाग्ने बताएका थिए ।
प्रधानमन्त्री तथा कांग्रेस सभापति शेरबहादुर देउवानिवास बूढानिलकण्ठमा आज बसेको बैठकले तल्लो संरचनाको अधिवेशनको मिति तय गर्न नसकेको हो । तल्लो संरचनाको अधिवेशनको मिति केन्द्रीय समिति बैठक बसेर तय गर्ने नेता अर्जुननरसिंह केसीले जनाएका छन् ।
