मनाङ, १९ भदौ । आगामी मङ्सिरमा हुने प्रतिनिधिसभा र प्रदेशसभा सदस्यको निर्वाचनलाई लक्षित गरी हिमाली जिल्ला मनाङमा थपिएका मतदाता नामावलीको अद्यावधिक भइरहेको छ ।
प्रतिनिधिसभा र प्रदेशसभा निर्वाचनलाई लक्षित गरी गत असार १ देखि साउन १९ गतेसम्म सङ्कलित मतदाता नामावलीको अद्यावधिकको काम भइरहेको निर्वाचन कार्यालयले जनाएको छ । स्थानीय तह निर्वाचनपछि जिल्ला निर्वाचन कार्यालय र जिल्ला प्रशासन कार्यालयमा सङ्कलित नयाँ मतदाताको नामावली अद्यावधिक गरी वास्तविक नामावलीको तयारीका लागि नयाँ मतदाता नामावली सार्वजनिक गरिएको जिल्ला निर्वाचन कार्यालयका निमित्त प्रमुख निर्वाचन अधिकारी अनन्त सुवेदीले जानकारी दिनुभयो ।
उहाँका अनुसार सङ्कलित नयाँ मतदाताको नामावली दाबी विरोधका लागि सार्वजनिक गरिएको हो । यही भदौ १३ देखि १५ गतेसम्म अद्यावधिकका लागि अन्तक्र्रियासहित उजुरी, दाबी विरोधका निम्ति सार्वजनिक गरी वडा, पालिका, प्रदेश तथा क्षेत्र तहसम्म पु¥याउन अनुरोधसमेत गरिएको सुवेदीले बताउनुभयो ।
मतदाता नामावली दर्ताका लागि जिल्लाका विभिन्न पालिकाबाट सदरमुकामसम्म जिल्लावासी आएको उहाँले बताउनुभयो । “प्रतिनिधिसभा र प्रदेशसभा सदस्यको निर्वाचनका लागि जिल्लावासी उत्साहित भएको देखियो, यसले निर्वाचन जनताले नै चाहनुभएको बुझिन्छ”, उहाँले भन्नुभयो ।
मनाङमा महिला तीन हजार पाँच सय २४ र पुरुष तीन हजार तीन सय २० गरी छ हजार आठ सय ४४ मतदाता पुगेको सुवेदीले बताउनुभयो । मनाङमा बाहिरी जिल्लाका व्यक्तिले भने नामावली दर्ता गराएका छैनन् ।
