काभ्रे बेथानचोकमा बस दुर्घटना हुँदा १७ जनाको मृत्यु,१३ जना घाईते

काभ्रेपलाञ्चोकको बेथानचोक गाउँपालिका ४ मा आज बेलुकी बस दुर्घटना हुँदा १७ जनाले ज्यान गुमाएका छन ।
जिल्ला प्रहरी कार्यालयकाका अनुसार बा ३ ख ४३८५ नम्बरको बस दुर्घटना हुँदा १७ जनाको ज्यान गएको हो भने अन्य १३ जना घाइते भएका छन । बनेपा नगरपालिका–११ बाट ब्रतबन्धका लागि बेथानचोक गाउँपालिका–५ च्याल्टी पुगेर पनौति फर्किँदै गरेको ‘रिजर्भ’ बस दुर्घटनामा परेको हो । प्रहरी नायब उपरीक्षक ढुण्डिराज न्यौपानेका अनुसार १५ जनाको दुर्घटनास्थल र अन्य दुई जनाको बनेपाको शिर मेमोरियल अस्पतालमा उपचारका क्रममा ज्यान गएको हो ।
दुर्घटनामा घाइतेहरूमध्ये आठ जनाको बनेपाको शिर मेमोरियल अस्पताल र अन्य पाँचको धुलिखेल अस्पतालमा उपचार भइरहेको छ । दुर्घटनास्थलमा नेपाल प्रहरी र नेपाली सेनाको टोलीले डोजर प्रयोग गरी उद्धार गरिरहेको छ । यसबारे आवश्यक अनुसन्धान पनि भईरहेको छ ।