काठमाडौँ, असोज ६ । सञ्चारमैत्री वातावरण निर्माणका लागि सरकार लागिपरेको सूचना तथा सञ्चारमन्त्री मोहनबहादुर बस्नेतले बताएका छन् ।
राष्ट्रिय फोटो पत्रकार समूहको २१औँ वार्षिकोत्सव समारोहका अवसरमा आयोजित कार्यक्रममा उनले सञ्चार क्षेत्रको विकास भए मात्र मुलुकको विकास र समृद्धि हुने बताए । सूचना प्रविधिको विकासका कारण संसारका धेरै मानिस धनी बनेको र धेरै देशले विकास र समृद्धि गरेको भन्दै मन्त्री बस्नेतले सूचना प्रविधिको क्षेत्रलाई देशभर विस्तार गर्ने गृहकार्यमा सरकार जुटिरहेको बताए । कात्तिक मसान्तभित्र देशका हरेक कुनाकाप्चामा टेलिफोन सेवा पुर्याउने गरी काम अगाडि बढिसकेको उनले बताए ।
राष्ट्रिय आमसञ्चार प्रतिष्ठान निर्माण, न्यूनतम पारिश्रमिक कार्यान्वयन लगायतका आधारभूत कुरालाई लागू गर्नेमा सरकार गम्भीर भएर कार्य गरिरहेको छ । मन्त्री बस्नेतले मुलुकको हरेक परिवर्तनमा फोटो खिच्ने नाउँमा आफ्नो ज्यानलाई जोखिममा राखेर फोटो पत्रकारले पुर्याएको योगदानको प्रशंसा गर्दै फोटो पत्रकारलाई परेको समस्याको समाधानका लागि मन्त्रालय सदैव सकारात्मक रहेको जनाए । नेपाल पत्रकार महासंघका महासचिव रमेश विष्टले विद्यागत पत्रकारिताको विकासका लागि फोटो पत्रकार संस्थागत रुपमा अगाडि बढेको भन्दै आगामी दिनमा अझ सशक्त भएर अगाडि बढ्न आग्रह गरे । फोटो पत्रकारिताका नाममा पत्रकारले लाखौँ रुपैयाँ खर्च गरेर क्यामरा किने पनि क्यामरा र मान्छेको बीमा नहुँदा समस्या परेको बताउँदै उनले मन्त्रालयलाई उक्त कुरामा विशेष ध्यान दिन अनुरोध गरे ।
प्रेस सेन्टरका अध्यक्ष महेश्वर दाहालले नेपाली पत्रकारिताको विकासमा फोटो पत्रकारले महत्वपूर्ण भूमिका निभाएको बताए । समूहका अध्यक्ष धुव्र आले, पूर्वअध्यक्ष कवीन्द्रमान शाक्य, राष्ट्रिय पर्यटन पत्रकार सङ्घका अध्यक्ष शिव अधिकारी लगायतले फोटो पत्रकारिताको विकासका लागि राज्यले विशेष ध्यान दिनुपर्नेमा जोड दिएका थिए । विसं २०५३ मा स्थापना भएको समूहमा हाल ३१ जिल्लाका ४०० भन्दा बढी फोटो पत्रकार आबद्ध रहेको समूहका सचिव प्रदीपराज वन्तले जानकारी दिए ।
कार्यक्रममा विभिन्न विद्यामा फोटो पत्रकारितामार्फत योगदान पुर्याएको भन्दै पाँचजना फोटो पत्रकारलाई सम्मान गरिएको थियो । सम्मानित हुनेमा गोरखापत्र दैनिकका फोटो पत्रकार राजेन्द्र चित्रकार, मनोरञ्जन फोटो पत्रकार कवीन्द्रमान शाक्य, संस्कृति तथा सम्पदा फोटो पत्रकार गणेशकुमार श्रेष्ठ, साहसिक फोटो पत्रकार राजेश गुरुङ र पर्यटन फोटो पत्रकार किरण आचार्य रहेका छन् ।
