धुलिखेल, असोज ३० । मन्त्रिपरिषद् विस्तार भए पनि निर्वाचनलाई केही असर नपर्ने प्रमुख निर्वाचन आयुक्त डा अयोधीप्रसाद यावदले बताएका छन् ।
सोमबार काभ्रेको धुलिखेलमा प्रतिनिधि सभा सदस्य र प्रदेशसभा सदस्य निर्वाचन २०७४ का लागि ‘निर्वाचन सामग्री तथा व्यवस्थापन क्षेत्रीय प्रशिक्षक तालीम कार्यक्रममा बोल्दै उनले सरकार भनेको राजनीतिक विषय भएकाले त्यसबाट निर्वाचनमा कुनै असर नपर्ने बताएका हुन् । उनले यसअघि पनि निर्वाचनको बेलामा सरकारको परिवर्तन, मन्त्रिपरिषद् विस्तार तथा प्रधानमन्त्री समेत परिवर्तन भएको उल्लेख गर्दै त्यस्तो बेलामा समेत निर्वाचन सम्पन्न गरेको बताए ।
उनले आगामी मंसिर १० र २१ गतेको निर्वाचन मुख्य विषय भएकाले निर्वाचनलाई अर्जुन दृष्टिले हेर्दै सम्पन्न गर्न गइरहेको बताए । सरकार थपघटको कुरामा निर्वाचन आयोग फस्नु नहुने यादवले बताउँदै मूल अभियान जसरी भए पनि निर्वाचन सफल गर्ने र त्यसैले सरकारलाई आफुहरुले आग्रह गर्ने बताए । निर्वाचन आयोग यस विषयमा निष्पक्ष र यसको सञ्चालनमा कुनै कसर नपरोस् भनेर आग्रह गरिरहेको प्रमुख निर्वाचन आयुक्त डा. यावदले बताए ।
आइतबार समानुपातिक तर्फको बन्द सूची सफल भएको र अरु कार्यक्रम पनि अगाडि बढिरहेको अवस्थामा सबै सरोकारवाला निकायले अन्यथा लिएर अतिरञ्जीत नगर्न समेत अनुरोध गरे । अहिलेसम्मको प्रजातान्त्रिक संस्कारको रुपमा हेर्दा २०६४ मा पनि २०७० र स्थानीय तहको निर्वाचनमा पनि सरकार परिवर्तन भएको छ । निर्वाचनमा लाग्ने सबै प्रकारका कुल खर्चमध्ये २५ प्रतिशत मात्रै केन्द्रमा बस्ने र बाँकी ७५ प्रंतिशत जिल्लामा जाने प्रमुख निर्वाचन आयुक्तको भनाइ छ ।
उनले मन्त्रिपरिषद्को संख्या ठूलो रहेकाले आरचासंहिता उलंघन गर्ने सम्भावना रहने भन्दै त्यसका लागि जिल्लास्थित प्रमुख जिल्ला अधिकारी लगायत निर्वाचनमा खटिने कर्मचारीलाई समेत आवश्यक निरीक्षण गर्न अनुरोध गरे । उक्त प्रशिक्षण कार्यक्रम सै सम्पन्न हुने आयोगले जनाएको छ ।
