काठमाडौं, असोज ३१ । गैर आवासीय नेपाली संघ(एनआरएनए)को अध्यक्षमा भवन भट्ट विजयी भएका छन् ।
प्राप्त समाचार अनुसार अध्यक्षमा भट्टले एक हजार एक सय ९७ मत ल्याएर विजयी बनेका हुन् भने उनका प्रतिद्वन्द्वी जमुना घले गुरुङले ५८४ मत प्राप्त गरिन् ।
२००३ स्थापना भएको एनआरएनएको निर्वाचनमा पहिलो पटक प्यानलगत आधारमा चुनाव भएको हो । संघको उपाध्यक्षमा कुमार पन्त र कुल आचार्य तथा महिला उपाध्यक्षमा सपिला राजभण्डारी निर्वाचित भए । यस्तै महासचिवमा डा. बद्री केसी,सचिवमा डिबी क्षेत्री र कोषाध्यक्षमा हिक्मत थापा निर्वाचित भए ।
शनिवारदेखि सुरु भएको एनआरएनएको ८ औ विश्वसम्मेलनको मतदान सोमबार बेलुकादेखि सुरु भएको थियो । मतदान राती साढे ११ बजेसम्म चलेको थियो ।
२० वर्ष अगाडि अध्ययनको लागि जापान पुगेका भट्ट एनआरएनएमा दुई कार्यकाल उपाध्यक्ष र एक कार्यकाल कोषाध्यक्ष भएर काम गरिसकेका छन् ।
