काठमाडौँ, असोज ३१ । आयुर्वेदलाई मौलिक चिकित्साका रूपमा विकास गरिनुपर्ने स्वास्थ्यमन्त्री गिरिराजमणि पोखरेलले बताएका छन् ।
राष्ट्रिय आरोग्य दिवस तथा धन्वन्तरी जयन्तीका अवसरमा आयुर्वेद विभागद्वारा आयोजित कार्यक्रममा बोल्दै उनले आयुर्वेदलाई प्रभावकारी बनाउनका लागि मौलिक चिकित्सा पद्धतिका रूपमा विकास गर्नुपर्ने कुरामा जोड दिए । नसर्ने रोगको जोखिम न्यूनीकरणका लागि आयुर्वेद र योगको महत्व रहेको उनको भनाई छ । मन्त्री पोखरेलले भने– हामीले संयुक्त राष्ट्रसंघमा योग दिवस मनाउने प्रस्ताव पहिल्यै नलगेर गल्ती ग¥यौँ अब बुद्ध जयन्तीको अवसरमा ध्यान दिवस पनि मनाउने प्रस्ताव लैजानुपर्छ ।
उनले नयाँ स्वास्थ्य नीतिमा आयुर्वेदका सम्पूर्ण विषयलाई समेट्ने प्रतिबद्धता पनि जनाएका छन् । आयुर्वेद विभागका महानिर्देशक डा. वासुदेव उपाध्यायले प्रत्येक विद्यालयबाटै योग र स्वास्थ्य जीवनशैलीबारे विद्यार्थीमा शिक्षा दिनु जरुरी रहेको बताए । पर्याप्त बजेटको अभावमा आयुर्वेद र योगसम्बन्धी प्रभावकारी कार्यक्रम सञ्चालन हुन नसकेकाले यसमा लगानी बढाउन समेत उनले आग्रह गरका छन् । योगाभ्यास र पञ्चकर्मबारे जनतालाई सेवा दिनका लागि बूढानीलकण्ठमा अन्तर्राष्ट्रिय स्तरको योग सेन्टर बन्ने भएको छ ।
आयुर्वेद विभागको करिब १४ रोपनी जग्गामा ‘राष्ट्रिय आयुर्वेद पञ्चकर्म तथा योग सेन्टर’ निर्माण लागेको हो । सामान्य जनतादेखि विशिष्ट, अति विशष्टि व्यक्तिसम्मका लागि बन्ने ठूलो योग सेन्टरमा अहिले प्रशासनिक भवन बन्दैछ, जसका लागि रु एक करोड ५० लाख छुट्याइएको छ, अन्य भवनका लागि नक्साङ्कन भइरहेको बताउँदै महानिर्देशक उपाध्यायले पूरै भवनका लागि गुरुयोजना बनाउन लागिएको र यसका लागि करिब रु एक अर्ब खर्च हुने अनुमान गरिएको बताए ।
उक्त सेन्टरमा स्वास्थ जीवनशैली, सन्तुलित खानपान, योग, पञ्चकर्म, अकुपञ्चर लगायतको सेवा दिई नसर्ने रोगबारे कार्यक्रम हुने बताइएको छ । राष्ट्रिय आरोग्य दिवस तथा धन्वन्तरी जयन्तीको अवसरमा मंगलबार टेकुदेखि नरदेवीस्थित आयुर्वेद चिकित्सालयसम्म प्रभातफेरी गरिएको थियो ।
स्वास्थ्यमन्त्री पोखरेलले टेकुस्थित शुक्रराज ट्रपिकल तथा सरुवा रोग अस्पतालका बिरामीलाई फलफूल वितरण समेत गरेका थिए ।
