काठमाडौ, कात्तिक ६ । काठमाडौं उपत्यकामा १० वर्षसम्म मेडिकल कलेज खोल्न प्रतिबन्ध लगाउने गरी सरकारले राष्ट्रिय चिकित्सा शिक्षा अध्यादेश पास गरेको छ ।
सोमबार बसेको मन्त्रिपरिषद् बैठकले अध्यादेश पास गरेको हो । अध्यादेशलाई राष्ट्रपतिले जारी गर्न भने बाँकी नै छ । संसदबाट विधेयक पास नभएपछि सरकारले डा. गोविन्द केसीसँग अध्यादेश ल्याउने सहमति गरेको थियो । अध्यादेशमा काठमाडौं उपत्यकाका काठमाडौं, भक्तपुर र ललितपुरमा १० वर्षसम्म मेडिकल कलेज खोल्न नदिइने उल्लेख छ । यस्तै एउटा विश्वविद्यालयले ५ वटा मेडिकल कलेजलाई मात्र सम्वन्धन दिन सक्ने अध्यादेशमा उल्लेख गरिएको छ । यससँगै मनमोहन, काठमाडौं नेशनल लगायतका मेडिकल कलेजले सम्बन्धन पाउने बाटो बन्द भएको छ ।
अध्यादेश नयाँ संसदको बैठक बसेको ६० दिनभित्र पास हुनु पर्ने संवैधानिक व्यवस्था गरिएको छ । यदि पास हुन सकेन भने स्वत खारेज हुनेछ ।
