हेटौंडा, कात्तिक ७ । मुलुकका ३५ प्रतिशत जनताको पहुँचमा ऊर्जा (विद्युत) पुर्याउने उपप्रधानमन्त्री तथा ऊर्जामन्त्री कमल थापाले बताएका छन् ।
उर्जा पुग्न नसकेका जनताबीच ऊर्जा उपलब्ध गराउन ऊर्जा मन्त्रालय र नेपाल विद्युत प्राधिकरणको संयुक्त प्रयासबाट युद्धस्तरमा कामको थालनी गर्न सम्बन्धित पदाधिकारीले चिन्तन गर्नुपर्ने उनको भनाई छ । नेपाल विद्युत प्राधिकरण क्षेत्रीय कार्यालय हेटाँैडाद्वारा आयोजित कार्यक्रमलाई सम्बोधन गर्देै ऊर्जामन्त्री थापाले मुलुकमा अहिले ऊर्जा शक्ति थप उत्पादन गर्न स्वदेशी तथा विदेशी लगानीकर्तालाई ऊर्जा मन्त्रालयले आह्वान गरिसकेको बताए । उनले मुलुकमा लोडसेडिङ सधैँका लागि घटाउन अहिले निर्माणधीन कुलेखानी तेस्रो आयोजनालाई यथाशीघ्र निर्माण सम्पन्न गर्न उच्च प्राथमिकताका साथ लाग्नुपर्र्ने बताए ।
कुलेखानी तेस्रो आयोजना निर्माण शुरु गरेको १० वर्ष बितिसकेको भए पनि अझ पनि विद्युत उत्पादन गर्न नसक्नु आयोजनाका पदाधिकारी र निर्माण कम्पनीबीच समझदारी अनुसार निर्माण कार्य शुरु नहुँदा सो आयोजनाले निकै क्षति व्यहोर्न परेकोमा चिन्ता व्यक्त गरे । सो अवसरमा ऊर्जा सचिव अनुप उपाध्यायले देशको विभिन्न क्षेत्रमा विद्युत उपलब्ध गराइएको भए पनि तराई क्षेत्रमा अवैध रुपमा विद्युत चुहावट गर्ने प्रविधिलाई नियन्त्रण गर्नुपर्ने र साना/साना जलविद्युत आयोजनालाई विद्युत उत्पादन गर्न सरकारले दीर्घकालीन योजना बनाइ कार्यान्वयन गर्न लागिएको बताए ।
नेपाल विद्युत प्राधिकरणका कार्यकारी निर्देशक कुलमान घिसिङले मुलुकमा लोडसेडिङ घटाउन ऊर्जा चुहावटलाई कडाइका साथ नियन्त्रण गर्न कार्यदलको गठन गरिएको बताएका छन् । ऊर्जालाई थप उत्पादन गर्न मन्त्रालयबाट अनुमति पाएका साना आयोजनालाई यथाशीघ्र विद्युत उत्पादन गर्ने कार्यलाई सञ्चालनमा ल्याउन र विदेशबाट थप ऊर्जा ल्याई औद्योगिक क्षेत्रलाई, उपभोक्तालाई विद्युत वितरण गर्न ऊर्जा मन्त्रालय र विद्युत प्राधिकरण लागिपरेको बताए ।
मन्त्री थापाले मकवानपुरको भिमफेदी गाउँपलिका–१ सानुटारस्थित निर्माणाधिन कुलेखानी तेस्रो आयोजनाको आज स्थलगत निरीक्षण गरी निर्माण कार्यबारे जानकारी लिए । कुलेखानी तेस्रो आयोजनाका प्रमुख सुभाष मिश्रले माघको पहिलो साताबाट सो आयोजनाबाट १४ मेगावाट विद्युत उत्पादन गर्ने लक्ष्यका साथ काम भइरहेको जानकारी दिए । रु चार अर्ब ५२ करोडको लागतमा कुलेखानी तेस्रो आयोजनाको निर्माण भइरहेको छ ।
