झापा, कात्तिक १० । कफ्र्यु अवज्ञा गरेको भन्दै झापामा प्रहरीले चलाएको गोली लागी २ जनाको मृत्यु भएको छ ।
अर्जुनधाराका ११ वर्षीय बालक लक्ष्मण शिवाकोटीको मृत्युको सत्यतथ्य छानविन मागसहित सुरु भएको आन्दोलनले उग्र रुप लिएपछि प्रहरीले गोलि प्रहार गर्दा २ जनाको ज्यान गएको हो । प्रहरीको गोली लागेर अन्य ३ जना गम्भिर घाइते भएको प्रहरीले जनाएको छ । मृत्यु हुनेमा अर्जुनधारा ११ निवासी ३० बर्षिय नरेस थापा र अर्का एक युवाको पहिचान नखुलेको बताइएको छ ।
गम्भिर घाइतेको वि एण्ड सी हस्पिटलमा उपचार भइरहेको छ । कफ्र्युको विरोधमा प्रदर्शनकारीले प्रहार गरेको ढुंगा लागेर ससस्त्र प्रहरी उपरीक्षक रमेश कुमार सुवेदी सहित ३० जना प्रहरी समेत घाइते भएका छन् । प्रदर्शन हिंस्रक बन्दै गएको भन्दै प्रहरीले दिउसो १ः३० बजेबाट कफ्र्यु लगाएको थियो । बिर्तामोडको मुक्तिचोकलाई केन्द्र मान्दै पूर्वमा बसपार्क छिर्ने बाटो, पश्चिममा चारपाने चोक, दक्षिणमा बिर्ताबजार र उत्तरमा महानन्दचोकसम्म अनिश्चितकालीन कफ्र्यू लगाएको छ । कफ्र्य अझै जारी छ ।
आन्दोलनकारीहरुले बिर्तामोड नगरपालिका मेयर धु्रव शिवाकोटीको बा. १० च ३०६१ नम्बरको निजी गाडी तोडफोड गरेका छन् भने उनको घरमा समेत ढुंगामुढा प्रहार भएको छ । बिर्तामोड नगरपालिकाको मे १ झ. १२१ नम्बरको गाडी पनि तोडफोड भएको छ ।
आन्दोलनकारीले मेयरका छोराको मे ७ प ३००० नम्बरको बुलेट बाइक समेत जलाइदिएका छन् । यस्तै, जिल्ला ट्राफिक प्रहरी कार्यालयमा पनि तोडफोड भएको छ ।
कार्यालय परिसरमा राखिएको पूर्वसांसद् प्रेम गिरीको मोटरसाइकल आन्दोलनकारीले जलाइदिएका छन् । उनीहरूले मुक्तिचोक आसपास जडान गरिएका सीसी क्यामेरा पनि फुटाएका छन् ।
