काठमाडौँ, कात्तिक १४ । लोकतन्त्रको स्थायित्व र आर्थिक समृद्धिका लागि आगामी निर्वाचनमा काँग्रेसले जित्नु पर्ने आवश्यकता रहेको प्रधानमन्त्री एवं नेपाली काँग्रेसका सभापति शेरबहादुर देउवाले बताएका छन् ।
प्रतिनिधिसभा र प्रदेशसभा सदस्यको निर्वाचन २०७४ का लागि आज एक समारोहमा काँग्रेसको घोषणापत्र सार्वजनिक गर्दै उनले काँग्रेसको नेतृत्वमा नै २००७ सालयता मुलुकमा ठूला परिवर्तन सम्भव भएको र मुलुकमा अब आर्थिक समृद्धि गर्न पनि आसन्न निर्वाचनमा पनि काँग्रेसले जित्नुपर्ने विचार व्यक्त गरे । कम्युनिष्ट शासन व्यवस्थामा व्यक्तिगत स्वतन्त्रता र मानवाधिकार हनन हुनाका साथै त्रासको वातावरण हुने बताउँदै प्रधानमन्त्री देउवाले जनतालाई देशको मालिक बनाउन लोकतन्त्र नै आवश्यक पर्ने र लोकतन्त्रको संरक्षण काँग्रेसले मात्र गर्न सक्ने बताए । हिमाल, पहाड र मधेशलाई जोड्ने एक मात्र पार्टी काँग्रेस भएको दाबी गर्दै प्रधानमन्त्री देउवाले समावेशी अधिकार स्थापित गर्न, राष्ट्रिय एकता बलियो बनाउन र राष्ट्रिय अन्तरर्राष्ट्रिय विश्वासका लागि पनि मुलुकमा काँग्रेसको जित हुन आवश्यक रहेको औल्याए ।
सात दशकपछि मुलुकमा नयाँ संविधानमार्फत राजनीति व्यवस्थाको टुंगो लागेको बताउँदै कार्यक्रममा काँग्रेसका वरिष्ठ नेता रामचन्द्र पौडेलले मुलुकमा अब आर्थिक समृद्धि आवश्यक भएको र यसका लागि काँग्रेसले घोषणापत्र मार्फत प्रतिबद्धता सार्वजनिक गरेको जानकारी दिए । ‘संविधान जारी गर्दाका सहयात्री दलहरु नै संविधानको मौलिकता परिवर्तन गरी अधिनायकवादतर्फ उन्मुख भएकामा चिन्ता व्यक्त गर्दै वरिष्ठ नेता पौडेले त्यस्तो प्रयासलाई काँग्रेसले कदापि सफल हुन नदिने बताए । पार्टीका महामन्त्री डा. शशांक कोइरालाले कम्युनिष्ट पार्टीहरु एक ठाउँमा उभिनु काँग्रेसका लागि चुनौती भएको उल्लेख गर्दै आगामी निर्वाचनमा सम्पूर्ण काँग्रेस नेता कार्यकर्ता एक ढिक्का भएर निर्वाचनमा होमिन अनुरोध गरे ।
पार्टीका नेता एवं घोषणापत्र तयारी समितिका संयोजक महेश आचार्यले घोषणापत्रका बारेमा जानकारी दिँदै राजनीतिक स्थायित्व, लोकतन्त्रको सुदृढीकरण र मुलुकको समृद्धिका लागि आगामी निर्वाचनमा काँग्रेसलाई जिताउनु पर्ने बताए ।
