ओखलढुंगा, मंसिर १ । आसन्न प्रतिनिधिसभा र प्रदेशसभा सदस्य निर्वाचनको प्रचारप्रसारमा बालबालिका प्रयोग गरिनु निर्वाचन आचारसंहिता विपरीत हुने भन्दै बालबालिका प्रयोग भए/नभएको अनुगमन गरिने भएको छ ।
निर्वाचनमा दलहरुको प्रचारप्रसारमा बालबालिका प्रयोग गरे नगरेको बालबालिका कार्यालयले अनुगमन गर्ने तयारी गरेको महिला तथा बालबालिका कार्यालय ओखलढुंगाका महिला विकास अधिकृत प्रवल श्रेष्ठले जानकारी दिएकी छिन् । एक नगरपालिका र सात गाउँपालिका रहेको ओखलढुंगाको सबै तहमा निर्वाचन प्रचारप्रसारमा बालबालिकाको प्रयोग भए/नभएको बारेमा अनुगमन टोली परिचालन गरिने तयारी भएको महिला विकास अधिकृत श्रेष्ठले बताइन् ।
जिल्लामा क्रियाशील राजनीतिक दलहरुले चुनावी प्रचारप्रसारलाई तीव्र बनाएकाले प्रचार प्रसारको क्रममा जिल्लामा बालबालिकाको प्रयोग हुनसक्ने भन्दै अनुगमन थालिने भएको छ ।
अनुगमनका लागि सिद्धिचरण नगरपालिकामा आमबहादुर कटवाल, सुनकोसी गाउँपालिकामा मनकुमार गुरुङ, मोलुङ गाउँपालिकामा अम्बिका श्रेष्ठ, मानेभञ्ज्याङ गाउँपालिकामा सविना राई, चिशंखुगढी गाउँपालिकामा जानुका कटवाल, खिजिदेम्बा गाउँपालिकामा सरिता तामाङ, लिखु गाउँपालिकामा छत्र खत्री र चम्पादेवी गाउँपालिकामा निर्मला खड्कालाई परिचालन गरिएको महिला विकास अधिकृत श्रेष्ठले बताएकी छिन् ।
