भीरबाट एक महिलाको मृत्यु

बद्री पन्त

जाजरकोट, मंसिर ४ । जाजरकोटमा भीरबाट लडेर आज एक महिलाको ज्यान गएको छ ।

जुँनीचाँदे गाउँपालिका ५ गर्खाकोटकी २६ बर्षिया जपना शाहीको मृत्यु भएको स्थानीय दिपक शाहीले जानकारी दिएका छन् । भैसीलाई घाँस काट्न गएकी शाहीको घर नजिकैको पाँगा भीरबाट लडेर मृत्यु भएको शाहीले बताउनु भएको छ ।

मृतक शाहीका ८ महिनाका छोरा छन् । शाहीको मृत्युले गर्खाकोट गाउँ शोकमग्न भएको छ । पछिल्लो समय जाजरकोटमा भीरबाट लडेर अकालैमा ज्यान गुमाउनेको संख्या बढ्दै गएको छ भने एक सातामा आधा दर्जनको ज्यान गएको जाजरकोट प्रहरीले जनाएको छ ।