मंसिर १८ । संविधान कार्यान्वयन, लोकतन्त्र रक्षा र विकासको एजेण्डा लिएर हिँडेको लोकतान्त्रिक गठबन्धनको विजयलाई कसैले पनि रोक्न नसक्ने नेपाली कांग्रेस र राष्ट्रिय प्रजातन्त्र पार्टीका नेताहरुले दावी गरेका छन् ।
आईतबार क्षेत्र नम्बर २ को विभिन्न ठाउँमा आयोजित चुनावी सभामा बोल्दै नेताहरुले लोकतन्त्रमा मात्र जनताका हक अधिकार सुरक्षित हुने र विकास निर्माण सम्भव हुने कुरा जनतालाई स्पष्ट भैसकेकोले लोकतान्त्रिक गठबन्धनको जित सुनिश्चित रहेको ठोकुवासमेत गरे । नेपालगन्ज उपमहानगरपालिका वडा नम्बर २ घरबारी टोलमा लोकतान्त्रिक गठबन्धनले गरेको चुनावी सभामा बोल्दै कार्यक्रमका प्रमुख अतिथी एवं राप्रपाका महामन्त्री डा धवलसम्शेर राणाले क्षेत्र नम्बर २ चुनावी जोडघटाउ गणना गर्दै लोकतान्त्रिक गठबन्धन पहिलो नम्बरमा रहेको दावी गरेका छन् । राणाले भने– ‘म अत्यन्त खुसी भएको छु, प्रत्येक वडा र टोलमा काँग्रेस र राप्रपाका सिंगो कार्यकर्ता क्रियाशील हुनुभएको छ, म विभिन्न टोलमा पुग्दा त्यो अवस्था भेटेको छु, यो हिसाबले हामी अहिले सम्म १ नम्बरमा छौं’।
चुनाव नसिकिएसम्म दुबै दलका कार्यकर्ता संगठित भएर लागेमा लोकतान्त्रिक गठबन्धनकै पक्षमा नतिजा आउने निश्चित रहेको नेपालगन्ज उपमहानगरपालिकाका मेयर समेत रहेका राणाले बताए । उपमहानगरका पिताले भने– देशमा एकदलिय निरंकुश शासन व्यवस्था ल्याउने उद्देश्यले वाम गठबन्धन निर्माण भएको र क्षेत्र नम्बर २ मा लोकतान्त्रिक गठबन्धनलाई नजिताए नेपालगन्ज उपमहानगरपालिकामा ठूला कामहरु अगाडी बढाउन कठिन हुन्छ । ‘वामपन्थी दल वा मधेसवादी दलले चुनाव जिते भने लोकतान्त्रिक गठबन्धनले जितेको नेपालगन्ज उपमहानगरपालिकाको कामलाई पाईला पाईलामा अवरोध पुर्याउने र त्यसको असर विकास निर्माणको काममा पुग्ने मेयर राणाले प्रष्ट्याए । चुनावी सभालाई सम्बोधन गर्दै नेपाली काँग्रेस बाँकेका उपसभापति सुनिलनरसिंह राणाले २०४६ सालदेखी नेपाली जनताले धेरै परिवर्तन स्वीकार गरिसकेको उल्लेख गर्दै अब जनता पछाडी फर्किन नचाहने बताए ।
‘वाम गठबन्धनले देशमा एक दलिय सशासन गर्न खोजेको र त्यसले जनताको स्वतन्त्रतालाई कुण्ठित पार्ने, साम्यवादमा कसैले पनि आफ्ना समस्या सुनाउन र राख्न नसक्ने भन्दै उनले ‘त्यसकारण आफ्नो अधिकार सुरक्षित गर्नका लागी नेपाली जनताले लोकतान्त्रिक गठबन्धनलाई भारी मतले जिताउन आग्रह गरे । राप्रपा बाँकेका अध्यक्ष नरेन्द्र पौडेलले २१ औं शताब्दीका नेपाली जनताले एक तन्त्रिय कम्यूनिष्ट शासन व्यवस्थालाई स्वीकार गर्न नसक्ने बताए । विश्वका धेरैजसो मुलुकमा कम्युनिष्टहरु पलायन भईसकेको बताउँदै उनले नेपालमा पनि एक दलिय कम्युष्टि शासन ल्याउन खोज्दा जनतालाई भ्रममा पार्ने कम्युनिष्टहरु सखाप भएर जाने बताए । उनले नेपालमा लोकतान्त्रिक शासन व्यवस्था बाहेक अर्को विकल्प नभएको बताउँदै लोकतन्त्रमा सबै दल, भाषा, धर्म, वर्गको अधिकार सुनिश्चित हुने धारणा राखे ।
कार्यक्रममा बाँके क्षेत्र नं २ बाट प्रतिनिधि सभामा लोकतान्त्रिक गठबन्धनका उम्मेदवार ओमप्रकाश आजादले लोकतान्त्रिक गठबन्धनको जित नै सम्पुर्ण नेपालीको जित रहने औल्याए । उनले भने– ‘हामीलाई एकदमै विश्वास छ, क्षेत्र नम्बर २ मा मात्र होईन, सिंगो बाँके जिल्लाबासीले लोकतान्त्रिक गठबन्धनलाई अत्यधिक बहुमतले विजय गराउनेछन् ।
