निर्देशक गोपालचन्द्र लामिछानेद्वारा निर्देशित चलचित्र ‘लम्फू’को रिलिज मिति घोषणा गरिएको छ । नायक सलोन बस्नेत स्टारर यो चलचित्र २०७५ बैशाख २८ गते रिलिज हुने बताइएको छ ।
छायांकनको लागि लामो समय लागेको यो फिल्ममा सलोनसहित कबिर खड्का, मरिश्का पोखरेल, चाँदनी शर्मा, सञ्जित भण्डारी, कुशाग्र भट्टराई, कुशुम श्रेष्ठ लगायतको अभिनय देख्न पाइन्छ । तरकारीवालीको नामले चर्चित कुशुमले ‘लम्फू’ चलचित्रबाट नै डेब्यू गरेकी हुन् । कुशुम गत बर्ष संसारभर तरकारीवालीको नामले चर्चित बनेकी थिइन् ।
‘लम्फू’ले एक युवाको जीवनमा आईपर्ने अकल्पनिय घटनाहरु प्रस्तुत गर्छ, जसमा प्रेमकथा समेत गौण छ । यो चलचित्रमा समय र परिस्थितिले मानिसलाई नायक र खलनायक दुबै बनाउँछ भन्ने देखाइएको निर्देशक लामिछानेले बताए । ‘लम्फू’लाई पपुलर मल्टिमिडियाको लागि शक्तिबल्दब घोरासैनीले बनाएका हुन् ।
भूपतिको लेखन रहेको यस चलचित्रमा दिपक बज्राचार्यको छायांकन रहेको र हरि सिलवालको सम्पादन रहेको छ । अर्जुन पोखरेलको संगीत रहेको यस चलचित्रका गीतमा प्रमोद खरेल, शिव परियार, दुर्घा खरेल लगायतको स्वरले सजिएको छ ।
