काठमाडौं, पुस ७ । कांग्रेसले तत्काल सरकार छोडेर सशक्त एवं प्रभावकारी प्रमुख प्रतिपक्षमा बस्नेगरि तयारी गर्नुपर्नेमा सिँचाईमन्त्री सञ्जय गौतमले जोड दिएका छन् ।
अहिलेको जनादेशले हामीलाई प्रतिपक्षमा बस्न भनेको छ, हामीले अब त्यही अनुसारको तयारी गर्नुपर्छ उनले भने । रिपोर्टर्स क्लब नेपालद्वारा आज आयोजित साक्षात्कारमा बोल्दै मन्त्री गौतमले मुलुकमा अहिले नयाँ परिवेश र परिस्थिति सिर्जना भएको बताएका छन् । उनले भने– हामी अब उपयुक्त समयको प्रतिक्षामा छौं, उपर्युक्त वातावरण बनाएर सरकार छाड्छौं, कांग्रेसको तयारी अब सशक्त प्रतिपक्षमा बस्नको लागि हुन्छ, हामी जनमतको कदर गर्छौ । यद्धपी उनले प्रधानमन्त्री शेरबहादुर देउवाले समय आएपछि कुर्सी छोड्ने विश्वास दिलाए ।
मन्त्री गौतमले अहिलेको जनमत वाम गठबन्धनको पक्षमा देखिएकाले एमाले–माओवादी केन्द्रवीच एकता होस् भन्ने शुभकामना पनि व्यक्त गरे । उनले भने– हुन त उहाँहरुवीचको एकता हुन्छ भन्ने म सरल देख्दिन्, भयो भनेपनि मुलुकको लागि राम्रो हुन्छ, हाम्रो शुभकामना छ । राष्ट्रपतिसमक्ष रहेको राष्ट्रिय सभासम्बन्धी अध्यादेश सरकारले विधिसम्म्त, प्रक्रियागत र संवैधानिक रुपमै प्रस्तुत गरेको उल्लेख गर्दै मन्त्री गौतमले हामीले राष्ट्रपतिकहाँ पठाएको अध्यादेश कानूनसम्मत, विधिसम्मत र परम्परागत रुपमै आएको र यसलाई अनावश्यक किसिमले लम्ब्याउने काम नहोस् भन्दै यसरी लम्ब्याउँदा संविधान नै डिरेल गर्न लागिएको भन्ने शंका उत्पन्न भएको बताए । राष्ट्रिय सभाको निर्वाचनपछिमात्रै संघीय संसदले पूर्णता पाउने भएकोले यसलाई तत्काल स्विकृत गराउनुको विकल्प नभएको उनको भनाई थियो ।
उनले राष्ट्रपतिले आफ्नो संवैधानिक अधिकार प्रयोग गर्न पाउने भएकोले उनको भूमिकामा टिकाटिप्पणी गर्नु अमर्यादित हुने समेत जिकिर गरे । राष्ट्रपतिले अध्यादेशलाई पूर्णता दिनुपर्छ, मलाई विश्वास छ, उहाँले अब विलम्ब गर्नुहुँदैन, उहाँसँग अब अध्यादेश अनुमोदन गर्नुको अर्को विकल्प छैन उनले भने । समानुपातिक–समावेशी सिद्धान्तलाई आत्मसाथ गर्दै एकल संक्रमणीय व्यवस्था अनुसार अध्यादेश ल्याईएको उनले जनाए ।
मुलुकलाई केन्द्रमा राखेर सबै पार्टीले सोच्नुपर्ने भन्दै तर एमालेका नेताहरुले अलिक बढि नै एरोगेन्ट देखाउनु भएको छ, यो विषयमा मध्यममार्गी बाटो अपाउनको लागि पनि नेकपा माओवादी केन्द्रका अध्यक्ष पुष्पकमल दाहाल प्रचण्डले भूमिका खेल्नुपर्छ, खासगरी सरकार र दलवीच सम्बाद सुचारु गर्न उहाँको भूमिका यतिवेला खाँचो छ उनले भने । उनले खेल सुरु भएपछि कांग्रेसले खेलको नियम परिवर्तन गर्यो भनेर आफूहरुलाई लगाईएको आरोप गलत भएको स्पष्ट पारे । उनले भने– अहिले खेल नै सुरु भएको छैन, हामी गणितीय खेलको पक्षमा छैनौं, हामी त अब सशक्त र प्रभावकारी प्रतिपक्षको भूमिकामा बस्छौं ।’ निर्वाचनमा पार्टी संस्थागत रुपमा चल्न नसक्दा पराजय भोग्नु परेको उनको भनाई थियो । उनले भने,‘अहिलेको परिणामले हामीलाई स्तब्ध बनाएको छ, प्रत्यक्ष र समानुपातिकको मत हेर्दा हामीलाई सोच्न बाध्य बनाएको छ, यसको लागि समिक्षा गर्न हामीले तत्काल केन्द्रिय कार्य समिति बैठक बोलाउनुपर्छ, हामी समिक्षा गरेर उपर्युक्त बाटो अपनाउँछौं ।
गौतमले अहिलेको निर्वाचनमा कांग्रेसको परिणाम हेर्दा नेतृत्व असक्षमताको पुष्टि भएको समेत स्पष्ट पारे । उनले भने,‘हाम्रो संगठन राम्रो भएन, संगठनलाई प्रभावकारी रुपमा अघि बढाउन सकिएन, त्यसैले तत्काल केन्द्रिय समिति, महासमिति बोलाएर समिक्षा गर्छौ । उनले संसदीय दलको नेता को बन्ने भन्नेबारे अहिले नै भन्नु हतार हुने समेत स्पष्ट पारे । उनले भने,‘संसदीय दलको नेता बन्न ईच्छा सबैको हुन्छ, तर अहिले को बन्छ भनेर भन्नु हतार हुन्छ, यस विषयमा टाउको जोडिन बाँकी छ । उनले पार्टी नेतृत्व गर्न युवाहरुले सोच राख्नु अतिशोयोक्ति नहुने समेत बताएका छन् । उनले भने,‘तर देशभरिका साथीहरुको टाउको जोडिन बाँकी छ, म पनि युवा नै हो नि, तर राजनीति लहडमा चल्दैन् ।
एमालेका उपाध्यक्ष वामदेव गौतमलाई पराजित गरेका नेता गौतमले आफू कामको हेभीवेट भएको सुनाए । उनले भने,‘नामको हेभीवेटले हुँदैन, म त कामको हेभीवेट हुँ, मलाई बर्दियाको माटोले पत्याउँछ भन्नेमा सुरुदेखि नै विश्वास थियो, मलाई पनि पार्टीले उचित मुल्यांकन गर्छ ।
