काठमाडौं, पुष १० । पछिल्लो समय चलचित्र क्षेत्रमा निकै व्यस्त देखिने नायक राई अभिनित चलचित्र ‘ह्याप्पी डेज’को ट्रेलर सार्वजनिक भएको छ ।
माघ १२ गतेबाट प्रदर्शनमा आउन लागेको चलचित्र ‘ह्याप्पी डेज’को सार्वजनिक ट्रेलरमा एक्सन, लभ तथा ड्रामाको स्वाद पस्किएको छ । नायिका प्रियंका कार्की, नायक सञ्जय गुप्ताको प्रेममा परेको यस चलचित्रमा देख्न पाइने छ भने दयाहाङ राई, प्रियंकालाई लभ नै नगरि सिधै सिन्दुर हाल्ने बताउँदै गरेको ट्रेलरमा सार्वजनिक गरिएको छ ।
चलचित्र क्षेत्रमा अहिलेको समयमा निकै व्यस्त मानिएका राई र कार्कीबीचको सम्बन्ध अनि चलचित्र ट्रेलरबाटै स्पष्ट हुन्छ कि चलचित्र त्रिकोणात्मक प्रेमकथामा आधारित छ । मिलन चाम्स निर्देशित ‘ह्याप्पी डेज’लाई लन्डन सिने आइ र चाम्स इन्टरटेनमेन्टको ब्यानरमा निर्माण गरिएको हो ।
रोमान्टिक ड्रामा मिश्रित यो चलचित्रमा दयाहाङ राई, प्रियंका कार्की, सञ्जय गुप्ता, विक्की जोशी, शिशिर राणा, रुपा पुन, रिकेश चाम्स लगायतका कलाकारहरुको अभिनय रहेको निर्माण पक्षले जानकारी गराएको छ । पैसा कमाउन बेलायत पुगेको एक नेपाली युवकको बैधानिक बसोबासका लागि गर्ने संघर्षको कथा चलचित्रले बोल्छ ।
२ करोड ५० लाखमा निर्माण गरिएको ‘ह्याप्पी डेज’लाई रामकुमार केसीको छायाँकन रहेको छ । वीपि खनाल, भवानी शर्मा, हिराल जोशी र मिलन चाम्स निर्माता रहेको यो चलचित्र लन्डनका अलावा नेपाल, वेल्स, इङ्ल्याड, स्कटल्यान्ड लगायतका देशहरुमा छायांकन गरिएको निर्माण पक्षले जानकारी गराएको छ ।
ठूलो लगानीमा छायांकन सम्पन्न भएर प्रदर्शनको तयारीमा रहेको यस चलचित्रले निर्माण पक्षको लगानी उठाउँछ या डुवाउँछ त्यो भने प्रदर्शन पश्चात नै थाहा होला ।
