काठमाडौं, पुष १४ । एक समयका चर्चित नायक स्व. श्रीकृष्ण श्रेष्ठको आज जन्मदिन हो । उनको जन्म २०२७ पुष १४ गते भइको थियो ।
हाडको क्यान्सर भएका श्रीकृष्णको उपचारका क्रममा २०७१ साउन २५ गते भारतमा निधन भएको थियो । हरेक वर्ष श्रीकृष्णको जन्मदिनमा उनकी श्रीमती तथा अभिनेत्री श्वेता खड्काले समाज सेवा गर्दै आइरहेकी तर यसपटक भने युट्युबमा एक भिडियो सार्वजनिक गर्दै श्रीकृष्णलाई भावुक श्रद्धाञ्जली व्यक्त गरेकी छिन् ।
उनले भिडियोमा भनेकी ‘म तिम्रो कला यात्रामा हिँडेका पैतालाका डाबहरु पछ्याउँदै हिँडिरहेकी छु । तिम्रो आर्शिवादले सबैको साथ र माया पाएकी छु । फेरि नयाँ जीवन पाएकी छु जस्ता भावुक शब्दहरु व्यक्त गरेकी छिन् ।
श्रीकृष्ण र श्वेताले २०७१ साल असार २३ गते लगनगाँठो कसेका थिए । यी दुईले कहाँ भेटिएला र कोहिनूर चलचित्र एकसाथ गरेका थिए ।
श्रीकृष्णको निधनपछि लामो समयसम्म शोकमा डुबेकी श्वेताले कान्छि चलचित्रमार्फत पुनः नेपाली चलचित्र क्षेत्रमा पाइलाहरु अगाडि बढाएकी छिन् । उनीद्वारा निर्मित तथा अभिनीत चलचित्र कान्छी फागुन ४ गतेबाट प्रदर्शनमा आउँदैछ ।
