काठमाडौँ, पुष २३ । संगठन सुदृढीकरणका लागि राष्ट्रिय प्रजातन्त्र पार्टी (प्रजातान्त्रिक) ले प्रदेश नं २ मा कमला शर्मा र प्रदेश नं ६ मा विराज विष्टलाई केन्द्रीय पर्यवेक्षकको जिम्मेवारी दिएको छ ।
शर्मालाई प्रदेश नं २ को जनकपुर र विष्टलाई प्रदेश नं ६ को सुर्खेतमा पार्टी संगठनको अवस्थालाई स्थलगत अनुगमन गरेर दुई साताभित्र केन्द्रलाई प्रतिवेदन बुझाउने जिम्मेवारी दिइएको प्रवक्ता राजेन्द्र गुरुङले बताएका छन् ।
गत मंसिरको प्रतिनिधिसभा र प्रदेशसभा निर्वाचनमा पार्टीले बेहोर्नुपरेको पराजय तथा त्यस क्षेत्रमा सांगठनिक अवस्थामा देखिएका कमजोरीलाई सुधार गर्ने उद्देश्यले शर्मा र विष्टलाई ती प्रदेशमा खटाइएको पार्टीले बताएको छ । शर्मा वनराज्यमन्त्री र विष्ट विज्ञान तथा प्रविधि राज्यमन्त्रीको जिम्मेवारीमा समेत रहेका छन् ।
पार्टीले प्रत्यक्षतर्फ प्रतिनिधिसभामा चार स्थानमा उम्मेदवारी दिएको थियो भने प्रदेशसभामा प्रत्यक्षतर्फ उम्मेदवारी नै दिएको थिएन ।
