हेटौँडा, पुस २६ । यातायात क्षेत्रलाई समयसापेक्ष, प्रविधियुक्त र व्यवस्थितरुपमा सञ्चालन गर्नुपर्ने उपराष्ट्रपति नन्दबहादुर पुनले बताएका छन् । नारायणी यातायात व्यवसायी संघको ३१ औँ वार्षिक साधारणसभाको हेटैँडामा उद्घाटन गर्दै उनले भने– यातायात क्षेत्रलाई व्यवस्थितरुपमा सञ्चालन गर्न नीतिगत सुधारको खाँचो छ ।
उपराष्ट्रपति पुनले मुलुकको राजस्वमा १० प्रतिशत योगदान पुर्याइरहेको यो क्षेत्रको विकास र विस्तारका लागि सम्बन्धीत सबै पक्ष गम्भीर हुनुपर्ने बताउँदै केही दुर्गम जिल्लामा यातायात सेवा अहिले पनि पुग्न नसकेकाले त्यसक्षेत्रमा सडक सञ्जाल पुर्याउनुपर्नेमा जोड दिएका छन् । सो अवसरमा उपराष्ट्रपति पुनले नारायणी यातायात व्यवसायी संघद्वारा प्रकाशित स्मारिकाको विमोचन समेत गरेका थिए ।
प्रतिनिधिसभा सदस्य कृष्णप्रसाद दाहाल तथा प्रदेशसभा सदस्य इन्द्रबहादुर बानियाँ र प्रेमबहादुर पुलामीले सडक दुर्घटना नियन्त्रणमा यातायात व्यवसायी र राज्य दुवै गम्भीर हुनुपर्नेमा जोड दिदैं जनताको हितका लागि ढुवानी कार्य सहज बनाउन आग्रह समेत गरे ।
नारायणी यातायात व्यवसायी संघका अध्यक्ष बद्रीप्रसाद चौलागाईंले नेपालको कुना काप्चासम्म यातायात तथा सामान ढुवानी सेवा निजी क्षेत्रले गरिरहेको उल्लेख गर्दै सडक थप, फराकिलो र गुणस्तरयुक्त निर्माण गरी यातायात क्षेत्रलाई व्यवस्थित र सुरक्षित बनाउन राज्यले नीतिगत सुधार गर्नुपर्ने र यसका लागि छुट्टै यातायात मन्त्रालयको माग गरे ।
