केसीलाई रिहा गर्न सर्वोच्चले दियो आदेश

काठमाडौं,पुस २६ । सर्वत्र विरोध र आलोचना चलिरहेका बेला डा. गोविन्द केसीलाई रिहा गर्न सर्वोच्च अदालतले आदेश दिएको छ । अदालतको मानहानीको आरोपमा पक्राउ परेका केसीसँग आज वयान लिएपछि सर्वोच्चले वकिलको जिम्मामा रिहा गर्न आदेश दिएको हो ।

न्यायाधीशद्वय पुरुषोत्तम भण्डारी र बमकुमार श्रेष्ठको संयुक्त इजलासले डा. केसीलाई अधिवक्ता सुरेन्द्र भण्डारीको जिम्मामा छाडी बाँकी कारबाही अघि बढाउन भनेको छ ।

साथै डा. केसीले लगाएका आरोपबारे अध्ययन गर्न प्रधानन्यायाधीश गोपाल पराजुलीको नागरिकता र शैक्षिक प्रमाणपत्र पनि मगाउन आदेश दिइएको छ ।

अदालतको अवहेलनाको मुद्दा परेपछि सर्वोच्चको आदेशमा डा. केसीलाई सोमबार साँझ अनसनस्थलबाटै प्रहरीले पक्राउ गरेको थियो । केसीको पक्राऊले राजनीतिक तरंग नै पैदा भएको थियो ।