उम्मेदवारको टुङ्गो लाग्न नसक्दा मतदाता अलमलमा

मोरङ, विराटनगर, २६ । दोश्रो चरणको स्थानीय तहको निर्वाचन प्रदेश नं– १ को राजनीतिक केन्द्रविन्दुको रुपमा मानिएको हालै संशोधित विराटनगर महानगरपालिकाको स्थानीय तहको निर्वाचनका लागि प्रमुख दलहरुले नै उम्मेदवारको नाम सार्वजनिक गर्न नसक्दा मतदाता अलमलमा परेका छन् । दोस्रोचरणको निर्वाचनको मिति दुई पटक सारिएको र अहिलेसम्म मुख्य राजनीतिक दलले उम्मेदवारको नाम सार्वजनिक नगर्दा मतदाताहरु ऋझै पनि पुनः निर्वाचनको तिथि सारिने हो की भन्ने शंका र यसैको चर्चा सहित अलमलमा परेका छन् । नेकपा (माओवादी केन्द्र) ले विराटनगर महानगरपालिकाका प्रमुख, उपप्रमुखलगायत १९ वटै वडाका अध्यक्ष र सदस्यका नाम सार्वजनिक गरिसक्दा पनि नेपाली काँग्रेस, नेकपा (एमाले) संघीय समाजवादी फोरम, फोरम लोकतान्त्रिक नेपाल, राप्रपा लगायतका दलले अधिकारिक रुपमा उम्मेदवारको टुङ्गो लगाउन नसक्दा थप अन्योलता बढेको हो । विराटनगर महानगरपालिकाको मेयर पदका लागि काँग्रेसबाट अमृत अर्याल, विश्वनाथ रिजाल, भीम पराजुली र डिला संग्रौलाको नाम चर्चामा रहे पनि कसलाई आधिकारीक उम्मेदवार बनाउने भन्ने टुङ्गो नलाग्दा कांग्रेसीहरु बिच खैलाबैला सुरु भएको छ । नेपाली कांग्रेसका पार्टी सभापनि शेरबहादुर देउवा प्रधानमन्त्री बन्ने क्रममा केही जिल्लाका उम्मेदवारको टुङ्गो लाग्न ढिलाई भएको प्रमाण विराटनगर महानगरपालिकालाई उदाहरणको रुपमा लिन सकिन्छ । त्यस्तै नेकपा (एमाले) बाट पूर्वमन्त्री लालबाबुपण्डित, पार्टीका जिल्ला अध्यक्ष विनोद ढकाल, पूर्वअध्यक्ष महेश रेग्मीलगायतका नाम चर्चा परिचर्चा पाइरहेका छन् । विराटनगर महानगरपालिकाबाट राप्रपाको तर्फबाट पूर्व नगरप्रमुख प्रह्लाद साहको नाम जिल्लाबाट सिफारिस भएको बताइन्छ भने संघीय समाजवादी फोरम नेपालबाट जयराम यादव, भुराज राई र उमेश यादवको नाम चर्चामा छ । लोकतान्त्रिक फोरम नेपालबाट भविस श्रेष्ठको नाम अघि सारिएको छ । विराटनगर महानगरपालिकामा फोरम लोकतान्त्रिक र संघीय समाजवादीबीच तालमेलको सम्भावना रहेको बताइन्छ ।