काठमाडौँ, माघ ४ । उपत्यकाका सडकमा जथाभावी रहेको तार व्यवथापनको कामलाई काठमाडौं महानगरपालिकाले तीव्र बनाएको छ ।
त्रिपुरेश्वर चोकबाट आज बिहान दुई गाडी अव्यवस्थित तार संकलन गरेको कामपा वातावरण व्यवस्थापन विभाग, कार्यसञ्चालन शाखाका प्रमुख नगर प्रहरी निरीक्षक मीनबहादुर थापाले जानकारी दिए ।
सार्वजनिक बिदाको दिन पनि काम गरेका छौँ काम गर्ने थोरै, बिगार्ने धेरै भएपछि सकारात्मक प्रभाव देखिँदैन त्यसका लागि सबै जिम्मेवार हुनुपर्ने उनले बताए । संकलन गरिएको तारमध्ये सबैभन्दा बढी संकलित तारमा इन्टरनेट, केबल सेवा प्रदायकका तार र टेलिफोनका तार बढी छ ।
संकलन गरिएको तार टेकुमा राखिएको छ । सुरक्षाको दृष्टिकोणले जोखिम बनेका भुईंमा लतारिएको तार, प्रयोग नगरिएका तारले थप समस्या निम्त्याउने भएकाले तिनको व्यवस्थापन गर्नु जरुरी रहेको प्रमुख नगर प्रहरी निरीक्षक थापाले बताए ।
धुलो संकलन गर्ने, गैरकानूनी रूपले फोहर फाल्नेलाई निगरानी गर्ने, सडक विस्तारका क्रममा छरपष्ट भएका तार बटुल्ने, अव्यवस्थित तार आफैँ काट्ने वा अन्य निकायले काटेका तार व्यवस्थापन गर्ने अहिलेको नियमित काम भएको उनले बताए ।
सडक विस्तारका क्रममा हालसम्मा कामपाले ३० गाडी बराबरको तार व्यवस्थापन गरिसकेकोे र अब चाँडै नै सबै स्थानका अव्यवस्थित तार संकलन गरिने जानकारी गराइएको छ ।
