नक्कली नोट छाप्ने सामान सहित युवक पक्राउ

बुटवल । कार्यालय सञ्चालनको नाममा गैरसरकारी संस्थाको स्थापना गरी नक्कली नोट छाप्ने एक युवकलाई प्रहरीले पक्राउ गरी सार्वजनिक गरेको छ । प्रहरीको पक्राउमा परेका ती युवकबाट नक्कली नोट तयार पार्नका लागि प्रयोग गरिने सामान समेत बरामद गरेको छ । बुटवल उपमहानगरपालिका–११ स्थित नवदीप पथमा अपाङ्ग तथा असहायलाई सहयोग गर्ने उद्देश्यका साथ स्थापना गरिएको अर्फन हेल्पिङ हेन्ड (असहायका लागि सहयोगी हातहरु) नामको गैरसरकारी संस्थाको कार्यालयबाट रुपन्देही जिल्ला कञ्चल गाउँपालिका–६ का २१ वर्षीय सन्तोष मल्लले नक्कली नोट तयार गर्ने गरेको प्रहरीले जनाएको छ । प्रहरीले अभियुक्त मल्लसँगबाट नक्कली नोट तयार गर्न प्रयोग हुने फ्रि इन्क प्रिन्टर मेसिन, ल्यापटप र नक्कली नोट लगायतका सामानहरु प्नि बरामद गरेको इप्रका, बुटवलका प्रहरी नायब उपरीक्षक मुकुन्द मरासिनीले जानकारी दिए । प्रहरीले नक्कली नोट तयार गर्न प्रयोग हुने सामान उनको कार्यालय तथा निवासबाट बरामद गरेको हो । प्रहरीका अनुसार अभियुक्त मल्लले प्रभु बैंक शाखा कार्यालय, बुटवलमा खाता खोली बैंकमा पैसा साट्ने क्रममा बैंकका कर्मचारीलाई झुक्याएर बैंकबाट आफूले चेक साटेर प्राप्त गरेको पैसा आफूसँगै लगेको नक्कली नोटसँग साट्ने चलाखीपूर्ण काम गर्दै आएका थिए ।
उनले पहिलोपटक बैंकमा जम्मा गर्न लगेको पैसामा एक थान रु एक हजारको नोट समावेश गरेर साटेको र दोस्रोपटक रु एक हजारको १०० थान भित्र १४ थान नक्कली नोट राखेर साट्न सफल भएपछि अन्तिम पटक रु एक लाखको चेक साटेर आएको पैसा तत्कालै आफूले लगेको नक्कली नोटको गड्डीसँग साट्न सफल भएका थिए । पछिल्लो पटक मङ्गलबार बैंकले रु एक हजार दरको ७० थान नक्कली नोट फेला परेको भन्ने प्रहरीलाई सूचना दिएपछि प्रहरीले अनुसन्धान गर्दै जाने क्रममा बैंकमा राखेको सिसी क्यामेराको रेकर्ड हेर्दा पक्राउ परेका मल्लले नक्कली नोट ल्याएको पुष्टि भएपछि प्रहरीले उनलाई नियन्त्रणमा लिएर उनको कार्यालय र निवासमा छापा मार्दा ती सामान समेत बरामद भएको प्रनाउ मरासिनीले जनाए । उनले ती युवकको कार्यालय र निवासबाट नेपाली रु एक हजार दरका १०० थान नोट, रु ५०० दरका १०० थान र निजले सञ्चालन गरेको कार्यालयबाट रु एक हजार २५९ थान र रु १०० दरका पाँच थान नोट ल्यापटप, अर्फन हेल्पिङ हेन्ड नामको ब्यानर, अर्फन हेल्पिङ हेन्ड नामको रसिद, रबर छाप र पैसा छाप्न प्रयोगमा ल्याइएका कागज समेत बरामद भएको बताए ।