काठमाडौँ, माघ ९ । विधि र मापदण्ड बनाएर कर्मचारी समायोजन गर्नका लागि नेपाल निजामती कर्मचारी संगठनले सरकारलाई अनुरोध गरेको छ ।
संगठन केन्द्रीय कार्यसमितिको तेस्रो बैठकको निर्णय सार्वजनिक गर्न आयोजित पत्रकार सम्मेलनमा संगठनका अध्यक्ष केदारप्रसाद देवकोटाले विधि र मापदण्ड बनाएर कर्मचारी समायोजन गरे संगठनका पदाधिकारी एवं सदस्य जुनसुकै ठाउँमा गएर काम गर्न तयार रहेको बताए । देवकोटाले संघबाट प्रदेश तहमा कर्मचारी पठाउँदा जुनसुकै तहका कर्मचारीलाई एक श्रेणी बढुवा गरेर पठाउनुपर्ने कुरामा जोड दिए ।
संगठनले वर्तमान सरकारबाट भएका पूर्वाग्रही ढंगका नियुक्ति, सरुवा, बढुवा, काजलगायतलाई खबरदारी गर्दै आएको छ । यसैगरी प्रदेश र प्रतिनिधिसभाको निर्वाचनमा खटिएर निर्वाचन सफल गर्ने कर्मचारीलाई धन्यवाद व्यक्त गर्नका साथै कर्मचारी समायोजन गर्दा आधिकारिक ट्रेड युनियन र राष्ट्रियस्तरका ट्रेड युनियनसँग वार्ता र संवाद गर्नुपर्ने कुरामा जोड दिएको छ ।
समाजमा व्याप्त भ्रष्टाचार न्यूनीकरणका लागि कर्मचारीले स्वच्छ, निष्पक्ष र पारदर्शी भएर काम गर्नुपर्ने, निजामती अस्पतालबाट दिने सुविधालाई सरल र सहज बनाउनुपर्ने, सेवा दिँदा पहिले आउने सेवाग्राहीलाई प्राथमिकता दिनुपर्ने, सेवाग्राहीको पहुँचका लागि नागरिक सहायता कक्ष स्थापना गर्नुपर्ने जनाइएको छ । यस्तै संगठनको केन्द्रीय परिषद्को १७ औँ बैठक आगामी जेठमा काठमाडौँमा गर्ने, तेस्रो राष्ट्रिय महाभेला आगामी भदौमा काठमाडौँमा गर्ने र ६८ जिल्लामा सञ्चालित राष्ट्रसेवक सहकारीको पाँचौँ राष्ट्रिय भेला आगामी कात्तिकमा धनगढीमा गर्ने बताइएको छ ।
यसैगरी नेपाल निजामती कर्मचारी संगठन र नेपाल निजामती राष्ट्रिय कर्मचारी संगठनबीच एकीकरणका लागि आवश्यक छलफल र संवाद अगाडि बढाइने भएको छ । सवारी चालक, हुलाकी हल्कारा, वन रक्षक कार्यालय सहयोगीलगायत श्रेणीविहीन पदलाई पाँचौँ तहबाट छैटौँ पदमा वृद्धि गर्न पनि माग राखिएको छ ।
संगठनले सत्रौँ केन्द्रीय परिषद्को बैठकमा पेश गरिने विधान संशोधन प्रस्ताव तयार गर्न वरिष्ठ उपाध्यक्ष लेखनाथ कोइरालाको संयोजकत्वमा भवानी न्यौपाने, ललीतबहादुर महर्जन, रेवन्त गौतम, चेतनाथ न्यौपाने, शान्तिप्रसाद लुइँटेल र युवाचन्द्र घिमिरे रहेको एक समिति गठन गरेको छ । तराईका शीतलहरबाट प्रभावित पर्सा र बर्दघाट सुस्ता पश्चिम नवलपरासीका बस्तीमा राहत सामग्री बाँड्ने संगठनले बताएको छ ।
