माघ १५ । बैतडीको पुर्चौंडी नगरपालिका हाटमा बैंकिङ सेवा दिने उद्देश्यका साथ गत महिनादेखि सञ्चालनमा आएको ग्लोबल आइएमई बैंकको शाखामा इन्टरनेटको अभावमा सेवाग्राहीले प्रभावकारी सेवाबाट बञ्चित भएका छन् ।
इन्टरनेटको सुविधा नहुँदा बैंकिङ सेवा प्रदान गर्न अप्ठ्यारो भइरहेको शाखा प्रबन्धक शिवराज बिष्टले जनाए । नेपाल टेलिकमको भिसेटमार्फत इन्टरनेट जडान गरेको भए पनि इन्टरनेटले काम गर्न नसक्दा समस्या भएको उनको भनाइ छ । पुस १८ गते स्थापना भएको शाखाले कारोबार सञ्चालन गरेको भए पनि सेवा निकै ढिलो भएको सेवाग्राहीको गुनासो छ ।
खाता सञ्चालन गर्नमै एक हप्ताभन्दा बढी लागेको पुर्चौंडी –४ का सुरेन्द्र धानुकले बताए । उनले इन्टरनेटको असुविधाका कारण समयमै सेवा पाउन नसकेको बताएका छन् । घर नजिकै बैंक आएकाले खुशी भएका नागरिक बैंकिङ सेवा प्रभावकारी हुन नसक्दा निराश हुन थालेका छन् ।
नेपाल टेलिकमको दहतालमा रहेको टावरले घाम लागेको बेला मात्रै काम गर्ने गरेको छ । सो समस्या समाधानका लागि पहल गर्ने नेपाल टेलिकम बैतडीका प्रशासन सहायक तीर्थ चौधरीले बताएका छन् ।
