काठमाडौँ, माघ १५ । छिमेकी मुलुकसँग विगतको अभ्यास र मान्यतामा नभई आजको आवश्यकता र नयाँ मान्यताका साथ सुमधुर सम्बन्ध राख्ने नेकपा (एमाले) का अध्यक्ष केपी शर्मा ओलीले बताएका छन् ।
नेपाल चेम्बर अफ कमर्शको ६७ औँ साधारणसभाबाट निर्वाचित कार्यसमितिलाई बधाई दिन पार्टी कार्यालय धूम्रबाराहीमा आज आयोजित कार्यक्रममा बोल्दै अध्यक्ष ओलीले कुनै समयमा विश्वमा उपनिवेशको समय रहेको तर आजको विश्व सार्वभौम मुलुकको स्वाधिनताका आधारमा अघि बढिरहेकाले नेपालीले राष्ट्रको स्वाभिमानप्रति गौरव गर्नुपर्ने बताए । अब नेपाल तीव्र आर्थिक विकासमा अघि बढ्नुपर्छ ।
अहिलेको समय ठूला मुलुकले सानालाई अन्याय गर्ने समय होइन, संयुक्त राष्ट्रसंघको वडापत्र अनुसार सहअस्तित्वको मान्यताका साथ जानुपर्छ उनले भने । नेपालमा विकास नहुनपर्ने कारण नभएको र हाम्रा असाधारण स्रोत साधनको भरपूर प्रयोग गर्नुपर्ने उनको भनाई छ ।
अध्यक्ष ओलीले सार्वजनिक स्वामित्वका उद्योगलाई कमिसनका नाममा बेचेर सखाप पारेर होइन निजी क्षेत्रसँग सहकार्य गरेर नयाँनयाँ उद्योग खोलेर बेरोजगारी र कुशासनको अन्त्य गरेर जनतालाई सेवा दिने गरी आगामी सरकारले काम गर्ने बताए ।
