काठमाडौँ, माघ २३ । प्रशासन सञ्चालन गर्ने कर्मचारी नहुँदा बूढानीलकण्ठ नगरपालिकामा कामकारवाही प्रभावित बनेको छ ।
नगरपालिकाका प्रशासन सञ्चालन गर्ने एक मात्र प्रमुख प्रशासकीय अधिकृत लीला अधिकारी बिदामा बसेको र अन्य अधिकृतस्तरका कर्मचारी नहँुदा समस्या परेको नगरपालिकाका प्रमुख उद्धवप्रसाद खरेलले बताए । एक जना मात्र प्रशासन सञ्चालन गर्ने कर्मचारी प्रशासकीय अधिकृत छन् ।
उनी पनि बिदामा बस्दा अहिले प्रशासन सञ्चालन गर्ने कर्मचारी नभएको बताउँदै उनले प्रशासन शाखामा अधिकृतस्तरको कर्मचारी नहुँदा आफैँ काम गर्नुपरेको बताए । प्रशासन शाखामा अहिले एक नासु मात्र छन् । प्रमुख प्रशासकीय अधिकृत अधिकारी यही माघ १८ देखि २८ गतेसम्म बिदामा बसेका छन् ।
यसैगरी अहिले नगरपालिकामा स्वास्थ्य, महिला तथा बालबालिका, शिक्षा, कृषि, पशु, प्राविधिक र सामाजिक विकास शाखा स्थापना गरिए पनि पर्याप्त कर्मचारी नहुँदा काम प्रभावित भएको हो ।
कर्मचारीको अभावले आन्तरिक लेखा परीक्षण शाखा अझै नबनेको उनले बताए । अहिले नगरपालिकामा केन्द्रबाट थप कर्मचारी नआएको र पहिलाकै करार कर्मचारीद्वारा काम चलाउने गरेको उनले बताए ।
