टीकापुर, माघ २६ । नेकपा (माओवादी केन्द्र) सँग एकता भएर बन्ने नयाँ पार्टीको नाम नेपाल कम्युनिष्ट पार्टी (नेकपा) हुने नेकपा (एमाले)का वरिष्ठ नेता माधवकुमार नेपालले बताएका छन् ।
टीकापुरमा एमाले क्षेत्र नं १ क्षेत्रीय कमिटीद्वारा आज आयोजित कार्यकर्ता भेटघाट कार्यक्रमलाई सम्बोधन गदै उनले पार्टी एकतापछि पछाडिको पुच्छर झुण्डिएर रहेको नाम हटाइ नेपाल कम्युनिष्ट पार्टी (नेकपा) मात्र रहने बताए । २००६ सालमा पुष्पलाल श्रेष्ठले स्थापना गरेको पार्टीको नाम नेपाल कम्युनिष्ट पार्टी थियो ।
त्यसपछि उक्त पार्टी फुटेर नेकपाको पछाडि माले, मसाल, मशाल, एकता केन्द्र, एमाले हुँदै माओवादी केन्द्रलगायतका नामको पुच्छर झुण्डिएको तर अब ती झुण्डिएका पुच्छर हटाएर एउटै नाम नेपाल कम्युनिष्ट पार्टी बन्ने उनको भनाइ छ । नेता नेपालले आफूहरु र जनताले पनि एउटै कम्युनिष्ट पार्टी कहिले बन्ला भनेर प्रतीक्षारत रहेको बताए । उनले धेरै पार्टी हुनुभन्दा एउटै पार्टी बनेपछि जनतालाई पनि आफ्ना कुरा राख्न सजिलो हुने विचार व्यक्त गरे ।
नेता नेपालले दुई पार्टीबीच एकताको प्रयास भइरहेको जनाउँदै अहिले सैद्धान्तिक र संगठनात्मक कस्तो हुने भन्नेमा छलफल भइरहेको बताए । कस्तो विचार लिएर पार्टी एकता गर्ने र कस्तो संरचना बनाउने भन्नेमा अहिले छलफल जारी रहेको उनले बताएका छन् । पार्टी एकतापछि एमाले र माओवादीसँग भावनात्मक रुपमा कसरी जोड्ने भन्ने प्रयासमा रहेका छौँ उनले भने । पूर्वप्रधानमन्त्रीसमेत रहेका नेता नेपालले नेताको योग्यता र त्याग, अनुसार नै पार्टी एकतापछि उचित मूल्यांकन भएर जिम्मेवारी दिने बताए ।
उनले कसलाई कुनकुन ठाउँमा राख्ने भन्ने बिषयमा पनि छलफल भइरहेको जानकारी गराएका छन् । दुई पार्टीबीचको एकतालाई देशी विदेशी शक्ति भाँड्ने प्रयासमा लागेको भन्दै त्यसतर्फ सतर्कता अपनाउनुपर्नेमा उनले जोड दिए । नेता नेपालले वाम गठबन्धनप्रति जनताको ठूलो आशा र भरोसा भएकाले चाँडै नै एकतासँगै सरकार गठन गरेर त्यो आशा र भरोसालाई पूरा गर्ने बताए । कार्यक्रममा एमाले क्षेत्रीय संयोजक सूर्यचन्द्र भट्टराई र क्षेत्रीय इञ्चार्ज प्रेमबहादुर साउदले वाम गठबन्धनबाट जनताले मुलुक निर्माणको लागि ठूलो आशा राखेको हुनाले त्यो पूरा गर्नुपर्ने बताए ।
कार्यक्रममा केन्द्रीय सदस्यद्वय गरिमा शाह, प्रकाश शाह, एमाले जिल्ला कमिटी सदस्य दीर्घ सोडारी, टीकापुर नगरपालिकाका प्रमुख तपेन्द्र रावलको सहभागिता थियो ।
