राजविराज, फागुन ४ । लामो समयदेखि बाँकी बक्यौता नबुझाउने ४८७ जना ग्राहकको नेपाल बिद्युत् प्राधिकरण वितरण केन्द्र, राजविराजले विद्युत् लाइन काटेको छ ।
लामो समयदेखि बिद्युत् महसुल नतिरेका जिल्लाभरिका करिब साउनदेखि हालसम्म ४८७ जनाको लाइन काटिएको प्राधिकरणका प्रमुख चन्द्रनारायण साहले जानकारी दिए । त्यस्तै, साउनदेखि हालसम्म जिल्लाका विभिन्न ग्रामीण तथा शहरी क्षेत्रमा विद्युत् चोरी नियन्त्रण अभियान अन्तर्गत उपकरणसहित ४४२ जनामाथि कारबाहीसमेत गरेको उनले बताए ।
तीमध्ये २६३ जनालाई र १६९ वटा उपकरणमाथि कारबाही गरेको उनले जनाएका छन् । साथै, विद्युत् चोरी नियन्त्रण गर्ने अभियानका क्रममा पानी तान्ने मोटर, टेलिभिजन, पंखा, फ्रिज, हिटर लगायतका उपकरणसमेत बरामद गरेको बिद्युत् प्राधिकरणले बताएको छ ।
यस्तै, विद्युत् हुकिङ नियन्त्रणका क्रममा पक्राउ परेका व्यक्तिबाट रु १३ लाख २५ हजार ५ सय ७३ राजश्वसमेत असुली गरिएको छ । त्यस्तै, बाँकी बक्यौता रहेका ग्राहकबाट रु ८२ लाख ६५ हजारसमेत राजश्व असुली गर्न सफल भएको प्रमुख साहले जनाकारी दिए ।
यसैबीच, सप्तरी जिल्लामा विद्युत् हुकिङ बढेको जनगुनासो पाएपछि अहिले पनि जिल्लाको विभिन्न ठाउँमा विद्युतचोरी नियन्त्रण जारी राखेको प्राविधिक प्रमुख साहले बताए ।
