नवलपरासी, फागुन ६ । पहिलो पटक विदेशी कलाकारलाई पुनः नेपाल ल्याउने वातावरण बनाउन ‘अन्तर्राष्ट्रिय लोक साँस्कृतिक महोत्सव’को अयोजना गर्ने भएको छ । विदेशी कलाकारलाई नेपाल भित्र्याउने, नेपालको कला संस्कृतिलाई देश विदेशमा पुर्याउने उद्देश्यले पहिलो पटक अन्तर्राष्ट्रिय लोक साँस्कृतिक महोत्सव गर्न लागिएको आयोजक कल्चर मिडिया हाउसले जनाएको छ ।
नवलपरासी (बर्दघाट–सुस्ता पूर्व) गैँडाकोटस्थित नारायणी नदी किनारमा फागुन २१ गतेदेखि आयोजना हुने सो महोत्सवमा नेपालसहित इटाली, ग्रीस, इजरायल, कोस्टारिका, बंगलादेश, भारत, मलेसिया, इण्डोनेसिया गरी १० राष्ट्रका कलाकारहरुले आफ्ना मौलिक संस्कृती प्रस्तुती गर्ने छन् ।
महोत्सवमा रु ५० लाख खर्च हुने अनुमान गरिएको आयोजकले जनाएको छ । नेपाली मौलिक संस्कृती विदेशी कलाकारमार्फत विश्वभर फैलाउने र विदेशी मौलिक संस्कृती आदानप्रदान गर्ने उद्देश्यले नेपालमा नौलो कार्यक्रम आयोजना गरिएको कार्यक्रमका संयोजक तथा लोक गायक दीपक खड्काले बताए ।
आफ्नो मौलिक संस्कृती देखाउने र पर्यटनका लागि नेपाललाई चिनाउनका लागि पनि यो कार्यक्रम महत्वपूर्ण रहेको उनले बताए । मगर, गुरुङ, थारु, तामाङलगायत नेपालका विभिन्न जातजातिका मौलिक संस्कृतीलाई महोत्सवमा समावेश गरिने आयोजकले जनाएको छ ।
विश्वको सबैभन्दा उत्कृष्ठ संस्कृती नेपालको भए पनि हामीले यसको प्रचारप्रसार गर्न सकीएको छैन् कार्यक्रम संयोजक खड्काले भने — ‘ यस वर्ष देश विदेशका लोक मौलिक संस्कृती आदानप्रदान प्रयासमा हामी जुटेका छौं ।’
