पाल्पा, फागुन ९ । रामपुर नगरपालिका–१० गेझाका कृषकहरु तरकारी बिक्री गर्नका लागि बजार नपाउँदा चिन्तित बनेका छन् ।
स्थानीयवासी लिलानाथ भण्डारीले खेतबारीमा वर्षेनी विभिन्न जातका तरकारी फलाउने गर्छन् तर बिक्री गर्ने ठाउँ नहुँदा समस्यामा परेका छन् । भण्डारीले वर्षेनी करिब तीन रोपनी जमिनमा तरकारी लगाउँदै आएका छन् । बजार नहुँदा बिक्री गर्न समस्या भएको, तरकारी पर्याप्त मात्रामा उत्पादन भएपनि बिक्री गर्ने ठाउँ नभएको उनको गुनासो छ ।
कृषक हरिप्रसाद अधिकारीले पनि तरकारी व्यवसाय नै गर्छन् । तरकारी बिक्री गर्ने ठाउँको अभावमा उनी दुखी भएका छन् । उनलाई बजारको अभावले रातदिन पिरोलेको छ । गाउँमा जमिन र पानी प्रशस्त भएपनि तरकारी बिक्री गर्न बजार नहुँदा तरकारी कुहाएरै फ्याँक्नु परेको उनले गुनासो गरेका छन् ।
यहाँको मुख्य बजार रामपुरको बेझाड र स्याङ्जाको गल्याङ हो । त्यहाँ तरकारी पर्याप्त मात्रामा बिक्री हुँदैन । त्यसैले कृषकले हैरानी खेप्दै आएका छन् । यहाँ बुटवलबाट दिनहुँ सस्तो मूल्यमा तरकारी भित्रने गरेकाले स्थानीय उत्पादनले बजार पाउन सकेको छैन ।
कृषक र उपभोक्ता समस्यामा परेका छन् । मेहनत र परिश्रम अनुसारको बजार भाउको अभावमा कृषक मारमा पर्दै आएका छन् ।
