काठमाडौँ, फागुन १० । कवि कृष्ण जोशीलाई ‘वासु शशी साहित्य सम्मान–२०७३’ र साहित्यकार रमा शर्मालाई ‘वासु शशी साहित्य सम्मान–२०७४’ प्रदान गर्ने वासु शशी स्मृति परिषद्ले निर्णय गरेको छ ।
नेपाली भाषा साहित्यको क्षेत्रमा दुवै स्रष्टाले विगत लामो समयदेखि निरन्तर योगदान पुर्याउँदै आएका छन् । यसैगरी कवि एवं आख्यानकार गोविन्द गिरी प्रेरणालाई ‘वासु शशी साहित्य पुरस्कार–२०७३’ र साहित्यकार डा शैलेन्दुप्रकाश नेपाललाई ‘वासु शशी साहित्य सम्मान–२०७४’ प्रदान गर्ने भएको छ ।
उक्त सम्मान र पुरस्कारको राशि जनही १५ हजार रहेको छ । परिषद्का अध्यक्ष गणेश रसिकको अध्यक्षतामा बसेको कार्यसमितिकोे बैठकले साहित्यकार जोशी, शर्मा, प्रेरणा र नेपाललाई पुरस्कार दिने निर्णय गरेको परिषद्का सचिव प्रद्युम्न जोशीद्वारा जारी विज्ञप्तिमा बताइएको छ ।
उक्त पुरस्कार कवि एवं नाटककार वासु शशीको ८२ औँ जन्मजयन्तीको अवसरमा आगामी चैत १३ गते प्रदान गरिने भएको छ ।
