काभ्रे, फागुन १५ । भूकम्पसम्बन्धी जिल्लास्तरीय रुपमा राष्ट्रिय पुनःनिर्माण प्राधिकरण, काभ्रेले प्रदर्शनी गर्ने भएको छ ।
प्राधिकरणले विशेष गरेर भूकम्पपछि कस्ता घर बनाउनुपर्छ र जिल्लाको स्थिति के छ भन्ने विषयमा प्रदर्शनी गर्ने भएको हो । प्राधिकरणले पुनःनिर्माण प्राधिकरण, एनआरए र भूकम्पसम्बन्धी काम गर्ने विभिन्न गैरसरकारी संस्थाको समीक्षा बैठकका क्रममा उक्त निर्णय गरेको हो ।
पुनःनिर्माण सम्बन्धी सबैलाई जानकारी नभएकाले उक्त प्रदर्शनीको आयोजनाका विषयमा प्राधिकरण लागि परेको प्राधिकरण काभ्रेका प्रमुख धु्रव गैंडाले जनाए । प्राधिकरणले प्रदर्शनी कहिले गर्ने भन्ने विषयमा भने अहिलेसम्म निर्णय गरेको छैन ।
बैठकले सकेसम्म महोत्सवको अवसर पारेर गर्ने भन्ने निर्णय गरेको छ । त्यस्तै, प्राधिकरणकै नेतृत्वमा भूकम्प प्रभावित १४ जिल्लामा अनुगमन टोलीसमेत गठन गर्न लागिएको जानकारी दिइएको छ ।
डिएलपीआइओका अनुगमन तथा मूल्यांकन विज्ञ रोशन केशरीको नेतृत्वमा काभ्रेमा अनुगमन टोलीको गठन गर्न लागिएको हो । जोखिमयुक्त परिवारको सहयोगका लागि सहयोग गर्न गैरसरकारी संस्थासँग कुरा अगाडि बढाइसकेको गैंडाले बताएका छन् ।
साथै, गुनासो भरेका पीडितको तथ्यांक आइसकेको, नगरपालिका र गाउँपालिकामा पठाउन मात्र बाँकी रहेको उनले जानकारी दिए । तथ्यांकको पुनः जाँच भइसकेपछि मात्र सो तथ्यांक पठाइने उनको भनाइ छ ।
