काठमाडौँ, फागुन २९ । महिला हिंसामा संलग्न व्यक्तिलाई कडा कारवाही गरी महिलाको अधिकार सुरक्षित गरिने श्रम, रोजगार, महिला, बालबालिका तथा सामाजिक सुरक्षामन्त्री थममाया थापाले बताएकी छिन् ।
नेपाल कला परिषद्मा सांस्कृतिक संग्राहलय नेपालद्वारा आयोजित कार्यक्रममा ‘नेपालका विशिष्ट महिला’को तस्वीर अवलोकन गर्न पुगेकी मन्त्री थापाले राज्य निर्माणमा महिलाको महत्वपूर्ण भूमिका रहेको बताइन् । सबै विशिष्ट महिलाको तस्वीरलाई एक ठाउँमा ल्याएर संग्राहलयले राम्रो काम गरेको उनको भनाइ छ ।
समाजका बिभिन्न क्षेत्रमा विशिष्ट योगदान पुर्याएका महिलालाई सरकारले केही गर्न नसकेकाले आफ्नो कार्यकालमा यस्ता व्यक्तिलाई प्रोत्साहित गर्ने प्रतिबद्धता जनाउँदै उनले महिलाको अधिकारलाई सुरक्षित गर्नका लागि आइपरेका जटिलता हटाउनका लागि आफु लागिपर्ने बताइन् ।
मन्त्री थापाले महिला हरेक क्षेत्रमा सक्षम छन् भन्नेमा प्रदर्शनीले सन्देश दिएको पनि बताइन् । २४ गते शुरु भएको सो प्रदर्शनी ३० गतेसम्म चल्नेछ ।
