लहान, फागुन ३० । सिरहाको सुखीपुर नगरपालिका–८ स्थित गएराति आगलागी हँुदा तीनवटा पसल जलेर नष्ट भएका छन् ।
आगलागीबाट सुखीपुरको गुद्री बजारस्थित सञ्जीव गुप्ताको घरमा रहेको किराना, फेन्सी स्टोर्स र टेलर्स पसल जलेर नष्ट हुँदा करिब १५ लाख बराबरको धनमालको क्षति भएको इलाका प्रहरी कार्यालय, सुखीपुरका प्रहरी नायब निरीक्षक सुदर्शन दासले जनाएका छन् ।
गुद्री बजारस्थित उपेन्द्र साहको किराना पसलबाट अचानक लागेको आगो फैलिएर सञ्जीव गुप्ताको फेन्सी पसल र लटु यादवको टेलर्स पसलभित्र रहेका नगदसमेत जलेर नष्ट हुँदा उक्त मूल्य बराबरको सामान जलेर नष्ट भएको प्रहरीले बताएको छ ।
राति पसल बन्द गरेर घर गएका उपेन्द्र साहको किराना पसलबाट आगलागी भएको देखेपछि स्थानीयवासीले पसल सञ्चालक, बारुण यन्त्र र प्रहरीलाई खबर गरेका थिए । विद्युत् चुहावट सर्ट सर्किट भई उक्त आगलागी भएको अनुमान रहेको प्रहरीको अनुमान छ ।
लहान नगरपालिकाबाट आएको बारुण यन्त्र, प्रहरी र स्थानीयवासीको प्रयासमा आगो नियन्त्रणमा लिइएको थियो ।
