पोखरा, चैत २ । महानगरभित्रका ज्येष्ठ नागरिकको पोखरा लेखनाथ महानगरपालिकाले निःशुल्क स्वास्थ्य परीक्षण गर्ने भएको छ ।
महानगरपालिकाले आज आयोजना गरेको पत्रकार सम्मेलनमा प्रमुख मानबहादुर जिसीले महानगरका प्रत्येक वडाका घरदैलोमा नै चिकित्सक पुर्याएर ७० वर्ष उमेर पूरा भएका ज्येष्ठ नागरिकलाई लक्षित गर्दै उपचार सेवा प्रदान गर्न लागेको बताए ।
ज्येष्ठ नागरिक स्वास्थ्य परीक्षण कार्यक्रम अन्तर्गत हरेक दुई महिनामा प्रत्येक वडामा चिकित्सकसहितको टोलीले ज्येष्ठ नागरिकको निःशुल्क स्वास्थ्य परीक्षण एवं उपचार गर्ने जनाउँदै उनले महानगरभित्र ६० वर्ष उमेर पूरा गरेका ज्ेयष्ठ नागरिकको संख्या ३६ हजार छ भने ७० वर्ष माथिकाको संख्या १३ हजार रहेको जानकारी गराए ।
कार्यक्रम अन्तर्गत बिरामी परीक्षण एवं उपचार, स्वस्थ्य जीवनशैली सम्बन्धी परामर्श, थप उपचारका लागि प्रेषणका साथै यसका लागि सम्बन्धित वडा कार्यालय, ज्येष्ठ नागरिक सम्बद्ध संघ संस्था तथा निजी र सरकारी अस्पतालसँग समन्वय गरिने उनको भनाइ छ ।
यही चैत ४ गते वडा नं १९ बाट थालिने र अन्य वडाका लागि सम्बन्धित वडा कार्यालयसँग समन्वय गरी मिति र सयम तय गरिने महानगरपालिकाले बताएको छ । कार्यक्रमसँगै ज्येष्ठ नगारिकको स्वास्थ्यस्थिति र जीवनको गुणस्तरमा सुधार हुने अपेक्षा गरिएको प्रमुख जिसीको भनाइ छ ।
