कपिलवस्तु, चैत ५ । गतिलो जागिरको प्रलोभनमा पारेर बिचौलियाले भारत हुँदै तेस्रो मुलुक लैजान लागेको अवस्थामा यशोधरा गाउँपालिकास्थित मर्जादपुर सीमा नाकाबाट आइतबार ६ युवतीको उद्धार गरिएको छ ।
विदेशमा राम्रो खालको जागिर खाने मोहमा परेर अवैध रूपमा भारत हुँदै तेस्रो मुलुक जान लागेका ती युवतीलाई प्रहरीले उद्धार गरेको हो । सशस्त्र प्रहरी सीमा सुरक्षा बल मर्जादपुर कपिलवस्तुले सुराकीका आधारमा सीमा नाकाबाट कपिलवस्तुकै दुई र अन्य विभिन्न जिल्लाका चार गरी छ जना युवतीको उद्धार गरिएको बताएको छ ।
ती युवतीलाई कपिलवस्तु सदरमुकाम तौलिहवा हुँदै नेपाली सीमा नाका पार गराउन लागेको थाहा पाएपछि आइतबार सीमा निगरानीमा खटिएको सशस्त्र प्रहरी बलले युवतीसँगै एक जना बिचौलियालाई पनि नियन्त्रणमा लिएको छ । शंका लागेर सोधपुछका लागि उनीहरूलाई सम्पर्कमा ल्यायौँ सशस्त्र प्रहरी निरीक्षक अमृत दुलालले भने ।
सोधपुछका क्रममा बिचौलियाले राम्रो जागिर लगाइदिने लोभमा पारेर सीमा कटाउन लागेको उनले बताए । बिचौलिया गणेश खत्रीलाई प्रहरी चौकी मर्जादपुरमा जिम्मा लगाइएको छ ।
त्यहाँको मर्यादपुर–खुनुवा सीमा नाकामा महिलासम्बन्धी काम गर्ने कुनै पनि संघसंस्था नभएकाले चेलीबेटी ओसारपसारले प्राथमिकता पाउने गरेको स्थानीयवासीको भनाइ छ ।
