उपराष्ट्रपति पुनले आज सपथ ग्रहण गर्दै

काठमाडौं, चैत ५ । उपराष्ट्रपतिमा निर्विरोध निर्वाचित भएका नन्दबहादुर पुनले राष्ट्रपति विद्यादेवी भण्डारीबाट सपथ ग्रहण गर्ने कार्यक्रम आजलाई तय गरिएको छ ।

आज अपराह्न ४ बजे शीतल निवासमा भण्डारीबाट उनले पद तथा गोपनीयताको सपथ लिने कार्यक्रम रहेको छ । राष्ट्रपति तथा उपराष्ट्रपति दुवै जनाले आफ्नो कार्यकाललाई दोहोर्याउँदै गर्दा कतिसम्म सफल हुन्छन् भन्ने चिन्ता र चासोको बिषय बन्न पुगेको छ ।

शनिबार भएको उम्मेदवारी दर्तामा उपराष्ट्रपतिमा पुनको मात्र उम्मेदवारी परेपछि उनी निर्विरोध निर्वाचित भएका थिए । उपराष्ट्रपति पदमा निर्वाचित पुनलाई आइतबार निर्वाचन आयोगले प्रमाणपत्र प्रदान गरेको छ । उपराष्ट्रपतिमा पुनको यो दोस्रो कार्यकाल हो ।