नेपाली काँग्रेस ओखलढुंगाको आन्तरिक विवादका कारण उम्मेदवार छनोट प्रक्रिया लम्बिए पनि अन्ततः ८ वटै स्थानीय तहमा उम्मेदवारको टुंगो लगाएको छ । दुई गाउँपालिका प्रमुखमा देखिएको विवादले केन्द्रसम्म तानिदा निर्णयमा ढिलाई भएको थियो । टिकट वितरण कार्य पार्टी सभापति र माननिय रामहरि खतिवडाले एक पक्षिय टुंग्याएको भन्दै विवाद केन्द्रसम्म आइपुगेको थियो ।
अन्तत सुनकोशी गाउँपालिका र मानेभन्ज्याङ गाउँपालिकामा जिल्लाकै उम्मेदवार सदर गर्दै चुनावी माहोलमा कांग्रेस होमिएको छ । मानेभन्ज्याङ गाउँपालिका माननिय सांसद रामहरी खतिवडाको गाउँपालिका हो । त्यहाँबाट मोतिराज राईलाई अध्यक्ष उम्मेदवारको रुपमा अघि सारेको थियो भने जिल्लाका असन्तुष्ट पक्षहरुले ज्ञानेन्द्र रुम्दालीको नाममा अघि सारेको थियो । अन्तत मानेभञ्ज्याङ गाउँपालिकामा केन्द्रद्वारा वितरित टिकट मोतिराज राईलाई नै आधिकारिक उम्मेदवार बनाइएको छ ।
जिल्लाको एकमात्र सिद्धिचरण नगरपालिकामा काँग्रेसले पुराना नेता डिल्ली खनाललाई मेयरको रुपमा अघि सारेको छ भने उपमेयरमा हेमालक्ष्मी राई छन् ।
सिद्धिचरण नगरपालिकामा एमालेका जिल्ला अध्यक्ष तथा सोही नगरपालिका अर्थात साबिक ओखलढुंगा गाविसका पूर्व अध्यक्ष मोहनकुमार श्रेष्ठसँग प्रतिस्पर्धा गर्नुपर्ने छ । नेता खनाल नेपाली कांग्रेस ओखलढुंगाको राजनीतिमा ठूलो योगदान पुर्याएका व्यक्ति हुन् भने राई महिला संघकी जिल्ला सभापति हुन् । राईले एमालेकी इच्छा गुरुङसँग प्रतिस्पर्धा गर्नु पर्ने छ ।
त्यस्तै चिसंखुगढी गाउँपालिकामा टेकराज भट्टराई अध्यक्ष र खिला आले उपाध्यक्ष उम्मेदवार बनेका छन् । मोलुङ गाउँपालिका प्रमुखमा महेन्द्रबहादुर कार्की र उपाध्यक्षमा हेमकुमारी तामाङ लाई अघि सारिएको छ । महेन्द्र बहादुर कार्की सहिद लिला कार्कीका सहोदर भाइ सहिद परिवारका त्यागी सोझा र इमान्दार र आजसम्म कुनै पनि राजनैतिक लाभको पद नलिएका निष्ठावान व्यक्ति हुन् ।
मोलुङ गाउँपालिका एमालेका माननिय सांसद यज्ञराज सुनुवारको क्षेत्र हो । यहाँ एमालेका उप सचिव मणिराज राईलाई एमालेले गाउँपालिका प्रमुखका लागि उम्मेदवार बनाएको छ । मोलुङ गाउँपालिकामा ने.का का बालकृष्ण दाहाल, होमनाथ दाहाल, खिलानाथ दाहाल लगायत दर्जनौ नेताहरुको क्षेत्र भएकाले एमाले र ने.का. विच प्रतिस्पर्धा दरै हुने देखिन्छ । नेकपा एमालेका लागि मोलुङ गाउँपालिका फलामका चिउरा सावित हुने देखिन्छ ।
खिजी देम्वा गाउँपालिकामा ने.का ले शिक्षक बेदबहादुर रोकालाई प्रमुख पदका लागि अघि बढाएको छ । प्रमुखको उम्मेदवार बन्दै गर्दा रोकाले शिक्षकबाट राजीनामा दिएर उम्मेदवार बनेका हुन् भने उपप्रमुखमा शुशिला तामाङ्ग लाई अघि सारिएको छ । जनजातिको बाहुल्यता रहेको सो क्षेत्रमा रोक्काले एमालेका लाक्पा गेल्बु शेर्पासँग प्रतिस्पर्धा गर्नुपर्नेछ । नेपाली कांग्रेस जिल्ला सभापति प्रदीप सुनुवारको गाउँपालिका पनि यहि भएकाले यस क्षेत्रमा पनि एमाले र नेपाली कांग्रेसबिचको प्रतिस्पर्धा रोमाञ्चक बन्ने देखिन्छ ।
यस्तै लिखु गाउँपालिकामा नेपाली काँग्रेसका पुराना हस्ती अशोक कार्कीलाई प्रमुखको रुपमा अघि बढाइएको छ । लामो समय राजनीतिमा लगानी गरेका कार्की माओवादीका कारण बिस्थापित भएका व्यक्ति हुन । नेपाली कांग्रेसमा राजनीतिक हिसाबले ठूलो योगदान दिएका कार्कीले एमालेका नेता गोविन्द पौडेलसँग प्रतिस्पर्धा गर्दैछन् भने उप–प्रमुखमा मन्दिरा दाहाल र एमालेकी शान्ता ढुंगेलको प्रतिस्पर्धा हुदैछ ।
चम्पादेवी गाउँपालिकामा कांग्रेसका जिल्ला सचिव नवराज के.सी. गाउँपालिका प्रमुखको रुपमा अघि बढेका छन् । उप–प्रमुखमा निर्मला रैकालाई कांग्रेसले उम्मेदवार बनाएको छ । यहाँ कांग्रेस, एमाले र माओवादीबीच त्रिपक्षीय प्रतिस्पर्धा हुने देखिन्छ । एमालेले पलापुका शिक्षक हरिप्रसाद घिमिरे र माओवादीले फूलबारीका पूर्व गाविस अध्यक्ष तथा पूर्व एमालेका नेता खड्गबहादुर कार्कीलाई अघि सारेको छ ।
सुनकोसी गाउँपालिकामा काँग्रेसका युवा नेता रुद्रप्रसाद अघिकारी चुनावी मैदानमा छन् । उपाध्यक्षमा दुर्गा तामाङ उम्मेदवार तोकिएको छ । कांग्रेसको गढ मानिने सुनकोशी गाउँपालिकामा एमालेको तर्फबाट जि.वी खड्कालाई अघि सारिएको छ । अधिकारी स्थानीय स्तरमा नै चितपरिचित व्यक्ति भएका कारण उनी जितको नजिक छन् । त्यस्तै मानेभञ्ज्याग गाउँपालिकामा पूर्व गाविस अध्यक्ष मोतिराज राई गाउँपालिका प्रमुख र उप–प्रमुखमा सविता राईलाई अघि सारिएको छ । मानेभञ्ज्याङ र सुनकोसी गाउँपालिका काँग्रेसको बलियो किल्ला भएको कारण यहाँ पनि जित लगभग सुनिश्चित जस्तै देखिन्छ ।
