काठमाडौँ, चैत १३ । विश्वका सबै राष्ट्रसँग मित्रवत् व्यवहार गर्नु नेपालको नीति एवं सिद्धान्त भएको प्रधानमन्त्री केपी शर्मा ओलीले स्पष्ट पारेका छन् । कूटनीतिक नियोगका प्रमुख तथा विकासका साझेदारहरुलाई प्रधानमन्त्री निवासमा मंगलबार सम्बोधन गर्दै प्र.म.ओलीले नेपाल सबैको असल मित्र बन्न चाहाने र नेपालले पनि सबैलाई असल मित्रका रुपमा व्यवहार गरेको बताए ।
पञ्चशीलका सिद्धान्त, असंलग्नता, संयुक्त राष्ट्रसंघको बडापत्र, अन्तर्राष्ट्रिय कानून तथा विश्व शान्तिका मूल्य र मान्यताबाट नेपालको परराष्ट्र सम्बन्ध निर्देशित रहेको प्रष्ट पार्दै उनले स्वतन्त्र परराष्ट्र नीति तथा सन्तुलित कूटनीति सञ्चालन बाह्य जगतसँगको सम्बन्ध र सम्पर्क स्थापनाको विशिष्टता रहेको जानकारी गराएका छन् ।
कहिल्यै बाह्य शाक्तिको नियन्त्रणमा रहन नपरेको नेपाल र नेपालीका निम्ति मुलुकको सार्वभौमिकता, स्वतन्त्रता, स्वाभिमान र असंलग्नता अतिप्रिय छन् भन्दै उनले समावेशी लोकतन्त्र, सामाजिक–आर्थिक उन्नयनयुक्त नेपालको गरिमा विश्वसामु अभिवृद्धि नै कूटनीतिक लक्ष्य भएको प्रष्ट पारेका छन् । विधिको शासन राज्य सञ्चालनको केन्द्रमा रहने छ, भ्रष्टाचारप्रति शून्य सहनशीलता र भ्रष्टाचारमुक्त शासन व्यवस्था हाम्रो लक्ष्य हो — प्रधानमन्त्री ओलीले भने । कुनै पनि गुह्य कार्यसूचीबाट नेपाली जनतालाई शोषण गर्न नपाइने तथा अस्थिरता, विभाजन चाहने शक्तिविरुद्ध सारा स्रोतसाधन उपयोग गरेर तिनलाई नेपाली जनताको भलाईका निम्ति परास्त गरिने प्रतिबद्धता प्र.म. आलीले जाहेर गरे ।
नेपाली समाजमा हिंसाको कुनै स्थान नरहेको भन्दै प्रधानमन्त्री ओलीले सामाजिक सम्बन्ध र सद्भावमा खलल पु¥याउन खोज्नेलाई प्रश्रय नदिन आफु प्रतिवद्ध रेहेको अभिव्यक्ति दिएका छन् । समावेशी शासन व्यवस्था संविधानको मर्म रहेको बताउँदै ओलीले त्यसलाई इमान्दारीपूर्वक कार्यान्वयन गर्न पनि प्रतिबद्धता व्यक्त गरेका छन् ।
समानतामा आधारित सामाजिक न्यायबिना दिगो शान्ति र समृद्धिको कल्पनासमेत गर्न नसकिने बताउँदै प्रधानमन्त्री ओलीले विविधतायुक्त हाम्रो समाजको सामथ्र्यको स्रोत र पहिचान पनि सामाजिक विविधता भएको प्रष्ट पारे । संक्रमणकालीन न्याय प्रक्रिया स्वच्छ एवं निष्पक्ष होस् भन्नेमा नेपाल अडिग रहेको प्रष्ट्याउँदै प्रधानमन्त्री ओलीले देशभित्र वा बाहिरबाट त्यसमा प्रभाव पारिनुहुन्न भन्नेमा सरकार गम्भीर रहेको जानकारी गराए ।
संक्रमणकालीन न्याय सम्पादनका निम्ति दुई वटा आयोग कार्यरत रहेको बताउँदै उनले मानवीय कानून र मानवाधिकार उल्लङ्घनका गम्भीर मुद्दामा कसैलाई पनि आममाफी नहुने स्पष्ट पारे ।
अन्तर्राष्ट्रियस्तरमा शान्ति सुरक्षा कायम गर्न संयुक्त राष्ट्रसंघीय शान्ति स्थापक संस्थामार्फत नेपालबाट प्रभावकारी रुपमा निरन्तर योगदान हुने बताउँदै प्र.म.ओलीले भने राष्ट्रसंघको सुधारमा नेपालको समर्थन छ । उनले शान्ति, सुरक्षा, विकास, मानवाधिकारलगायत मामिलामा उक्त विश्व संस्थालाई निपूण, प्रभावकारी र उत्तरदायी बनाउनु समयको माग भएको जानकारी गराए । संयुक्त राष्ट्रसंघीय मानवाधिकार परिषद्को सदस्यका नाताले मानवाधिकार संरक्षणका खातिर विश्वभर नेपालले आवाज बुलन्द गर्ने र सकारात्मक परिवर्तनका निम्ति काम गर्ने प्रतिबद्धता व्यक्त गर्दै उनले परिषद्मा नेपालको भूमिका गैरराजनीतिक हुने स्पष्ट पारे ।
छिमेकी मुलुकका जायज चासोप्रति सरकार गम्भीर रहेको स्पष्ट पार्दै उनले कुनै पनि छिमेकीविरुद्ध नेपाली भूमि उपयोग हुन नदिने नेपालको अडानलाई दोहो¥याए । नेपालको विकासका साझेदारबाट निरन्तर प्राप्त सहयोग र समर्थनप्रति आभार प्रकट गर्दै उनले नेपालको विकासका प्राथमिकता र नेतृत्वको सम्मानका साथ सरकारी संयन्त्रलाई साथमा लिएर सघाउन अनुरोध गरेका छन् ।
उनले छिमेकका साथै सबै मुलुकसँगको सम्बन्धलाई अझ सुदृढ तुल्याउन आफू लागिपरेको जानकारी गराए । भारत र चीन नेपालका निकटका छिमेकी रहेको प्रष्ट पार्दै दुवै देशसँगको नेपालको सम्बन्ध अति सुमधुर रहेको उनले सुनाए । पारस्परिक विश्वास नै हाम्रो सम्बन्धको मुख्य तत्व हो– प्रधानमन्त्रीले भने ।
