काठमाडौ चैत १५ । बिभिन्न पर्व तथा दिवसमा दिइँदै आएको सार्वजनिक बिदा कटौती गर्ने मन्त्रिपरिषद्को बैठकले निर्णय गरेको छ ।
हिन्दुहरुको महान चाड वडा दशैमा १० दिन बिदा दिइँदै आएकोमा त्यसलाई घटाएर अब जम्मा ७ दिन मात्र पारिएको छ । दसैंको घटस्थापना, द्वादशी र कोजाग्रत पूर्णिमाको दिनमा दिइँदै आएको बिदा हटाइएको हो ।
त्यसैगरी रामनवमी, श्रीकृष्ण जन्माष्टमी, जनैपूर्णिमा, ऋषिपञ्चमीका दिन दिइँदै आएको बिदासमेत कटाइएको छ । सरकारले १२ दिन सार्वजनिक बिदा कटौती गरेको छ । कटौती गरिएका बिदामा गणतन्त्र दिवस, लोकतन्त्र दिवस, राष्ट्रिय एकता दिवस, सहिद दिवस र राष्ट्रिय प्रजातन्त्र दिवस रहेका छन् ।
संविधान दिवसमा मात्र सार्वजनिक बिदा दिइने भएको छ भने अन्य कुनै पनि दिवसका दिन सार्वजनिक बिदा नहुने भएको छ । संविधान दिवसलाई राष्ट्रिय उत्सवका रूपमा मनाइने सरकारको निर्णय छ ।
कुनै जाति, समुदाय, धर्म या भेग विशेषको चाडबाड र संस्कृतिका आधारमा राष्ट्रव्यापी बिदा दिने परम्परालाई तोड्दै ओली सरकारले यस्तो निर्णय गरेको हो ।
ल्होसार, क्रिसमस, छठ, माघीजस्ता बिदा सम्बन्धित समुदाय, धर्मावलम्बी या भेग विशेषलाई मात्र हुनेछ ।
