काठमाडौँ, चैत १६ । पशुपति क्षेत्रको हंशमण्डपमा धार्मिक पर्यटक बढाउने उद्देश्यका साथ शनिबार हरिनाम संकीर्तन गर्न लागिएको छ ।
नेपाल अन्तर्राष्ट्रिय कृष्ण भावनामृत संघ (इस्कोन)द्वारा आयोजित सो कार्यक्रममा बिहान ८ बजेदेखि साँझ ८ बजेसम्म भजनकीर्तन गरिनेछ । भगवान् कृष्णका अनुयायी जम्मा भई कार्यक्रममा विभिन्न १६ समूहमा बाँडिएर धर्मावलम्बीले कार्यक्रमको अवधिभर हरे कृष्ण, हरे कृष्ण, कृष्ण कृष्ण हरे हरे, हरे राम हरे राम राम राम हरे हरे भन्ने मन्त्र (श्लोक) लाई पटकपटक वाचन गरिनेछ ।
काम, क्रोध, लोभ, मोह अहंकारजस्ता दुर्गुणलाई हटाएर मात्र मुलुकमा शान्ति र सामाजिक न्याय प्राप्त गर्न सकिने विश्वास रहेको गुरु लोचनदास अधिकारीले बताए । सो कीर्तनले विश्व ब्रम्हाण्डमा एक प्रकारको कम्पन उत्पन्न गराउने र त्यसले सहभागीलाई सकारात्मक ऊर्जा दिने विश्वास राखिएको छ ।
करिब एक हजार सहभागी रहने सो कार्यक्रम सफल बनाउनका लागि समाजसेवी प्रदीपविक्रम राणाले करिब आठ लाख बराबरको आर्थिक सहयोग उपलब्ध गराएको संस्थाले बताएको छ । हिन्दू जागरण अभियानमा सक्रिय राणाले वैदिक धर्मका आधारमा विकास भएका परम्परागत मूल्य मान्यतासँग जोडिएका मानव सभ्यता, सम्बन्धलाई संरक्षण गर्नुपर्ने बताएका छन् ।
सांसारिक बन्धनबाट मुक्ति पाउनका लागि भगवान् कृष्णले सर्वसाधारणले मनमाथि नियन्त्रण गर्नुपर्ने शिक्षा दिएको अनुयायीहरुको भनाइ छ । महाभारतकालीन समयका सशक्त पात्रका रुपमा पनि कृष्णलाई लिइन्छ । उनले महाभारतको युद्धमा समाजमा न्याय र सत्य स्थापना गर्न अर्जुनलाई धार्मिक युद्ध गर्न दिएको उपदेशको सारसंक्षेपलाई गीता भनिएको छ ।
गीता वैदिक ज्ञान, साहित्यको सार हो र यसलाई नैतिक शिक्षाका लागि पवित्र ग्रन्थका रुपमा हिन्दू धर्मावलम्बीले लिएका छन् । गुरु चिन्तामणि योगीले भगवान् कृष्णको बाल्यकाल, युवावस्था र वृद्धावस्था सबै पक्षको सामाजिक सशक्तीकरणमा महत्वपूर्ण योगदान रहेको जनाए ।
सन् १८९६ मा भारतको कलकत्तामा जन्मिएका स्वामी प्रभुपादले विभिन्न गुरुसँग दीक्षा लिएर सन् १९६६ मा स्थापना गरेको इस्कोनले अहिलेसम्म विश्वका २०५ मुलुकमा सञ्जाल विस्तार गरेको छ । गुरुले सन् १९७७ मा शरीर त्याग गरेका थिए । उक्त संकीर्तन विधि यस कलियुगको लागि युगधर्म मानिएको छ ।
कार्यक्रममा सहभागी हुन विभिन्न मुलुकबाट पर्यटकको आउने क्रम जारी छ । कार्यक्रमका लागि आवश्यक तयारी पूरा भएको आयोजकले बताएका छन् ।
